Shillong, Rymphang 05
U MLA ka 17 North Shillong Constituency u Bah Adelbert Nongrum u la leit ban pynpaw ïa ka jingsngewkhia sha u Myntri ka tnat General Administration Department (GAD) u Bah Sosthenes Sohtun halor ka jingbym shngaiñ ka Meghalaya House Vellore.
Haba kren sha ki nongthoh khubor Bah Adelbert u la pynpaw ba u la ïoh ban sakhi dalade ïa ka jingbym shngaiñ jong katei ka ïingsah bad pynpaw ba ka Sorkar ka la donkam kyrkieh ban shna thymmai ïa katei ka jingtei.
“Kane ka ïing mynta ka don tang 5 tylli ki kamra bad la phiah ïa ki ban pynlong 10 tylli kiba dei jong ki riew paidbah bad 2 tylli ki dei ki kamra VIP, nga sngew dei ban kyntu ïa ka Sorkar lyngba u myntri ba peit ïa ka tnad GAD ba ka Sorkar kan leh kham kloi ban pynïoh ïa ka jingtei kaba thymmai bad ban don ki jaka ïeng kali ba biang bad kiwei de ki jingdonkam na ka bynta jong ki nongpang ,” la ong u Bah Adelbert.
Shuh-shuh u la ong ba kiba leit sha Vellore ki dei na ka bynta kiba pang ba shitom, ym ban leit sah kai ne leh sngewbha bad pynpaw ba ka long kaba donkam ban ai jingmut ïa ka Sorkar na ka bynta ka jingbit jingbiang ki paidbah kiba leit sah ha Meghalaya House Vellore.
Nalor kata u la pynkynmaw ruh ba u la rah ïa kane ka mat hapoh ka Ïingdorbar Thawaiñ ba la dep, bad kylli ruh ïa ka rukom pynïaid hapoh katei ka jaka bad haduh katno ngut ki nongpang ki la shah kyntait ban sah ha katei ka ïingsah, kaba u la ïathuh ba ha u snem 2024-25 kumba 112 ngut ki la shah kyntait ban ai jaka sah.
U Bah Adelbert, u la kyntu ïa ka Sorkar lyngba u Myntri ka tnad GAD ba kan shimkhia ïa kane ka kam, khnang ba kan pynsuk ïa ka leit ka wan jong ki nongpang kiba dei na ka Jylla Meghalaya kiba leit ban shah sumar sha Vellore.
