Mawkyrwat, Rymphang 05
U MLA ka Mawkyrwat u Bah Renikton Lyngdoh Tongkhar ha ryngkat ka jingdonlang u Bah K Nongbsaw, Executive Engineer, PHE Mawkyrwat Division ha ka 4 tarik u Rymphang 2025 ki la hiar jurip ïa ka jaka pynlang um “Treatment Plant” kaba tip kum ka Mawkyrwat Greater Water Supply Skhim kaba ki paidbah ki la ap khmih lynti la slem lano ban dep noh.
La mang tyngka ïa kane ka skhim ha ka jinglut kaba T.59 klur tam bad kane ka dei ka skhim JJM kaba heh duh ha ka distrik kaba sam umbam umdih ïa ki phra tylli ki shnong kata ka Mawten, ka Mawkyrwat, ka Mawlangwir, ka Wahsiej, ka Sohkhyllam, ka Mawmerang, ka Nongeit-ser bad ka Hilland.
Ha kane ka jinghiar jurip, la lap ba ka jingpyntrei ïa kane ka jaka pynlang um ka la ïaid shakhmat bad ka jingtrei ka la dep kumba 90% eiei.
U Bah Renikton haba kren sha ki lad pathai khubor u la pynpaw ïa ka jingsngewkmen ban ïohi ba ka jingpyntrei ka la jan dep bad ban ïohi ruh ba ka um kaba wan na ka tyllong ka khlaiñ bha haduh kine ki sngi tlang bad u kyrmen ruh ba kane ka tyllong um kan ïai bsa um ïa ki paidbah.
U buh ruh ka jingkyrpad ïa ki shnong ki thaw kiba don marjan ba kin nym pom pathar ïa ki dieng ki siej khnang ba kane ka tyllong um kan neh.
U la ong ruh ba ka jingplie ïa kane ka jaka pynlang um kan nym slem shuh namar ki sah sa tang katto katne ki kam ban pyndep bad u don ruh ka jingangnud ban ïawer ïa u Myntri Rangbah ka Jylla u Conrad Sangma ban wan plie ïa kane ka skhim kaba heh duh ha ka distrik bad ha ka jylla.
