Nongstoiñ, Rymphang 05
Kan long lehse ka rynsan kaba donkam tam ïa ki nongshong shnong ba kin ïoh ban pynpaw bad sei ïa ki sap ki phong, la ka long ha ka rwai ka siaw, ka shad ka mastieh, bad ruh ban ïai bteng ban pynneh pynsah ïa ka rukom shet tynrai jong ka thaiñ ïa kaba ki myn hyndai hynthai ki la btin lynti kumjuh ruh ha ka kam thaiñ jingthaiñ.
Ka Ge Thymmei u Mulliang, kawei na ki kynhun na ka thaiñ Ri Mulliang ka dei ka kynhun kaba la shim ïa ka sienjam ban wanrah ïa ka rynsan sha ki nongshong shnong bad ka dong Ri Mulliang ha ka sngi Palei kala ïoh ban pynlong ïa ka tamasa lane ka Ri Mulliang Festival halor ka phang “Wad shwa la Tynrai” ïa kaba la pynlong ha ka shnong Tynghor, West Khasi Hills.
U samla Pynshai Jeol Dkhar, President ka Ge Thymmei u Mulliang ha ka jingdonlang ki para nongkitkam haba kren bad ki lad pathai khubor halor kane ka tamasa u la ong, ka jingthmu jong kane ka tamasa ka long ba kin ïit bad shem ïa ki sap ban lah ban pynpaw sha ka pyrthei.
U la ong ruh ba kane ka dei ka rynsan ïa ki khun ki kti lane ki nongshong shnong jong ka thaiñ Ri Mulliang hi baroh kawei bad ha ka jingkheiñ ka jong ki shnong Garo ki don kumba 75 tylli bad haduh 45 tylli ki shnong Khasi.
U la ong ruh ba kane ka dei ka jingsdang kaba rit bha bad ki bun kiei kiei ki bym pat biang hynrei ka kynhun kala shim ïa ka rai ban pynlong bad ha kane ka tamasa ki don bun jait ki prokram.
Shuh shuh u la ong, ka phawar kaba la sngewthuh mynta kiwei pat ki jingrwai jong kane ka juk kaba mynta ki la tyllep noh ïa ka tynrai, kumta shuwa ba kan duh kan dam bad ki pateng ki ban wan kin klet ïa ka tynrai kum ka seng ka sngewkhia ïa kane bad kala shim ïa ka kabu ban pynlong ïa ka phawar bad u la ong ruh ba yn pynrung ruh ha ki jingthoh khnang ba kin nym duh bad ki para ki ban wan kin tip ïa ka tynrai lajong.
U la ong ruh ba nalor ka shet, ka phawar ka don ruh ïa ka thaiñ pla bad kane ka dei kawei ka jingangnud jong ka seng ban pynïaid ïew ïa kane ka jingthaiñ pla.
U samla Pynshai u la kyntu ruh ïa ki para nongshong shnong ba kim dei ban lehraiñ ïa la ka jong bad u la ong ruh ba ynda la dep katei ka tamasa, yn sa leit mih sha u Myntri ba dei peit ba la kumno kumno dei ban don noh la ka jong ka jaka ai jinghikai bad ym kwah ba kan shu kut noh tang ha ki mei tymmen hynrei ki pateng ba wan kin tip.
Shuh shuh u la ïathuh ruh ba ha kane ka tamasa kin sa wan ruh ban rwai da ki nongrwai kiba paw ka Jylla bad ka thong ka long ba ki samla kin ïoh ban ïeng rynsan lem.
