Shillong, Rymphang 05
U Myntri Rangbah ka Jylla u Conrad K Sangma u la ong ba ka Sorkar kan pynshitom ïa kiba donkti ban tih dewïong beaiñ ha Thangsko, East Jaiñtia Hills district.
Haba ïakren bad ki nongthoh khubor hadien ba la wai ka jingïalang ka kynhun Myntri, u la ïathuh ba haduh 18 tylli ki metïap la ïoh ban sei na ka jingbthei ha par dewïong kaba pyntrei beaiñ ha thaiñ Thangsko, East Jaiñtia Hills district.
U la ïathuh ba uwei u la mynsaw jur bad mar-mar la pynkit noh ïa u sha Ialong Civil Hospital na ka bynta ka jingsumar.
U la pyntip ba ka kynhun ka State Disaster Response Force bad katto katne ka kynhun National Disaster Response Force (NDRF) ki la hiar mar-mar sha katei ka jaka bad kumjuh ki tnad pulit na ka Jylla kiba kynthup ïa u Inspector General ka Eastern Zone, ki la poi sha katei ka jaka.
Shuh shuh u la ïathuh ban poi sha katei ka jaka tih dewïong ka jngai kumba 25 kilometre na ka head quarter kaba shimpor kumba 3 kynta bad kaba shem jynjar ban poi sha katei ka jaka namar ki lait tang ki kali four wheel.
U la pyntip ba ka Sorkar ka la phah ïa ki ar ngut ki Myntri Sorkar kata u Bah Wailadmiki Shylla bad u Bah Lahkmen Rymbui ban hiar sha katei ka jaka ban ïakynduh ïa ki bor ba dei peit ban pynlong ka jingtohkit bniah.
U la ïathuh biang ba ki pulit kin leh da kaba tyngeh ïa kiba donkti ïa katei ka kam beaiñ.
U la pynpaw ba ka Sorkar Jylla ka dang pynkhreh ban sdang ka jingtih dewïong katkum ka juk stad mynta hynrei ki don pat ki riew shimet kiba donkti ban tih beaiñ kumta ki pulit kin ai jingpynshitom kaba tyngeh.
