Shillong, Rymphang 05
Ha ka nohphai sngi jong ka 05 tarik u Rymphang, 2026, ki nongtrei lem bad kiba pahara ïa ka rung ka mih ki nongwan jngohkai ha Nan Polok, ha ka jingtalasi ïa u wei u samla uba kieng pla (air bag) ki la lap ïa ki kynja song kiba la pynsuba ba ki dei ki song jingdih pynbuaid.
Kumta mar-mar ki nongtrei bad ki ba pahara ha katei ka jaka ki la pyntip noh sha ki bor pulit ha kaba ka kynhun ki pulit na ka Anti Narcotics Task Force (ANTF) ka Jylla ki la wan ban peit bniah.
Utei u samla ba la shah bat, la tip kyrteng kum u Henjakapa, 25 snem ka rta uba dei na Kolasip Mizoram.
Na ka jingpeit bniah jong ki pulit la shem bad pynthikna ba u dei u Ganja ba la song bha ha ki kot khubor bad sop pat da ki plastik uba jan kot kumba 2 kilo shiteng.
Shuh shuh une u samla u la ïathuh ba u wan thied ïa u tei u Ganja na Iewduh bad thmu rah sha Mizoram bad ka jingwan rung jong u sha Nan Polok ka dei tang ban pynlut por ha ka ban peitkai ïa ka.
Ki bor pulit hadien ka jingkhmih bniah ki la rah noh ïa utei u samla sha Sadar Police Station bad ka jingtohkit ïa u ka dang ïaid shakhmat.
