Shillong, Rymphang 05
Ha ka jingmih ki khubor kiba ïadei bad ka jingkylla marjot bun tylli ki cycle ilektrik tang hapoh 6 bnai hadien ba ka Sorkar Jylla ka la plie paidbah myn ha u snem ba lah dep, na ka liang u nongthoh khubor u Nongsaiñ Hima u la leit sha katei ka jaka ban wad ïa ka jingshisha.
Kine ki cycle ilectrik ki dei kiba la pyllait paidbah da ka Sorkar Jylla ban ïada ïa ka mei Mairang na ka jingjaboh ha kaba ki paidbah ki lah ban shim wai ïa ki na ka jaka ïeng kali kaba don ha pyrshah ka State Bank Of India, Main Branch, Shillong.
Haba wad bniah halor kane la ïoh ban ïakren bad uba peit ïa katei ka jaka ai wai, uba la ïathuh ba haduh mynta ki dang don bun ki briew kiba shim wai ïa kitei ki cycle.
U la pyntip ruh ba ka jingkylla marjot ki katto-katne tylli ki cycle ka dei namar ka jingleh torti kiba shim wai.
Nalor kata, u la pyntip ruh ba na ka liang kaba pynïaid ïa kitei ki cycle kan sa shna pynbha noh ïa ki ha ki sngi ban wan.
Kum ban shu kdew hangne, ha u bnai Nailar 2025 u Myntri Rangbah ka Jylla u Conrad K Sangma ryngkat bad u tyngshop uba kyntiew ïa ka koit ka khiah ha ka met ka phad, ki la plie paidbah ïa kitei ki cycle ilektrik kiba lah ban ñiah wat ha ki jaka lum kum ha Nongbah Shillong.
Ka jingplie u Conrad Sangma ïa kitei ki cycle ka long kum shibynta ban pynsuk ïa ki nongñiah ha kino-kino ki rta bad ban kyntiew ruh ïa ka koit ka khiah.
Kane ka projek kaba la kyrshan da ka tnad Ministry of Housing and Urban Affairs ha ryngkat ka jingïatreilang bad ka GIZ India hapoh ka projek Sustainable Urban Mobility ban pynlong ïa ka Nongbah Shillong kum ka jaka ïaid kjat, jaka ñiah cycle ha kaba ka lyer kaba khuid ka jinglah ban ïaid laitluid bad ha ka rukom im kaba koit ba khiah kan kylla long ka jingshisha na ka bynta ïa baroh.
Hynrei mynta bun kiba la buh jingkylli halor kine ki cycle kiba la jot noh bad don ruh kiba la kynthoh ba ka Sorkar ka la shu pynsyrwa ei ïa ka pisa ka tyngka.
