Shillong, Rymphang 05
Kumba la bthah da ka Deputy Commissioner ka East Khasi Hills District, ha ka sngi Palei u BDO jong ka Mawryngkneng C&RD Block u Bah A. Lyngdoh ha ryngkat ki bor pynïaid shnong ka Sohryngkham lem bad ki dkhot jong ka My Meghalaya My Pride ki la leit ban jurip ïa ka jaka ba ki briew ki bret pathar ïa ki jaboh jabaiñ ha kawei ka jaka ki riew shimet kaba hap hapoh u pud u sam ka Shnong Sohryngkham, Neng Kyndong Basa.
Ha kane ka jingjurip na ka liang ki samla shnong ha ka jingïalam u samla Damutskhem Lyngdoh bad ka kynhun My Meghalaya My Pride ki la pynlong ruh ïa ka jingpynkhuid ïa kitei ki ñuit bad ki la lum ïa ki sakhi sabut lyngba ki jingthoh tiar online, ha ki ID skul bad kaba pynpaw ba utei u ñuit u wan na Sor bad kiwei de ki shnong ba marjan.
Haba kren sha ki nongthoh khubor u Bah Nicolas Kharnami, u la pynpaw ba katei ka jaka ba la wan ban bret ñuit, ka dei ka jaka riew shimet ba la longtrai da ka Kong M Pyngrope bad u la pynpaw ïa ka jingsngewdiaw na ka bynta ka trai jaka namar ka jingwan bret jaboh khlem akor ki briew lane khlem suidñiew bad khlem ka jingïa burom markylliang.
Haba ïadei bad kane, u Bah Nicolas u la ai jingmut ïa ka trai jaka ba kan shim ïa ka sienjam ban pyndonkam da ki bor jong ka aiñ, ba kan long ruh ka jingai jingsneng ïa kine briew kiba wan ban bret jaboh be-aiñ bad ba lyngba ka jingïatreilang jong ki trai jaka bad baroh lang kan wanrah ïa ka jingkylla kaba bha ha katei ka jaka bad ha ka shnong kumjuh.
U la bynrap ruh ba ka bor District ka dei ban shimkhia ïa kane ka kam da kaba shim da ka ‘suo moto case’ ba ïa katei ka kam dei ban pynbeit ha ka rukom kaba dei khnang ban pynthikna ba kum kine ki jingjia kim dei shuh ban dang jia ha kiwei ki jaka nangne shakhmat.
U Sordar Shnong Sohryngkham u Bah Donbor Kharmujai u la pynrem jur ïa katei ka jingwan bret ñuit pathar ki briew ha katei ka jaka kaba dang hap ha u pud u sam ka shnong, u la pynpaw ba na ka liang ka Shnong ka la buh ki jingmaham, hynrei kine kiei-kiei ki wan jia ha ka por mynmiet bad lada lap ïa kiba leh ïa kane ka kam, ka Dorbar Shnong ka don la ka jong ka kyndon shnong ban pynshitom ïa ki.
U la pynpaw ba na ka liang ka shnong ka la phah jingthoh sha ka tnad PWD ba kan ker sainar ïa katei ka jaka bad ka tnad ka la pyrshang ban leh la ka jong ka bynta bad kyrmen ba ka tnad ruh kan ai ïa ka jingïatreilang khnang ban lah ban tehlakam ïa ka jingwan theh ñuit pathar ki briew ha katei ka jaka.
