Shillong, Rymphang 05
Ka ïingbishar Meghalaya High Court ka la shim ‘suo moto notice’ ïa ka jingbthei ha ki lai tylli ki par dewïong ba pyntreikam beaiñ ha Thangkso, East Jaiñtia Hills bad ka la bthah ruh ïa u Deputy Commis-sioner, Superintendent of Police ba dei ban shimkhia mardor ïa kane bad ban ithuh bad kem ïa ki trai par bad ki nongpyntrei bad ban kurup lut ïa baroh ki tiar ki tar.
Ïa katei ka hukum la pynmih da ka Division Bench kaba la khlieh da u Justice HS Thang-khiew bad u Justice W Diengdoh ha ka sngi Palei hadien ba 18 ngut ki la ïap ha ka jingbthei ka thliew dewïong beaiñ.
Ka ïingbishar ka la pynpaw ïa ka jingsnge-wsih bad jinglyngngoh ba wat hapdeng ka jingjia kaba la jia dang ha ka 14 tarik u Kyllalyngkot, 2026, hynrei ka jingtih dewïong beaiñ ka dang ïai bteng ha katei ka thaiñ.
“Ka ïingbishar kam banse ban shim judicial notice ïa kine ki khubor. Ym lah ban sngewthuh ba kumno ka jingtih dewïong beaiñ ka dang bteng ha kane ka thaiñ watla kala don ka jingïap uwei u briew ha ka jingjia ba jia ha ka 14-01-2026,” ong ka ïingbishar ha ka hukum ba pynmih ha ka sngi Palei.
Ka ïingbishar kala bthah ruh ïa u Deputy Commissioner bad u Superintendent of Police ka East Jaiñtia Hills, ba kin shimkhia mar mar ha ka ban ithuh bad kem ïa ki trai par bad ki nongpyntrei par bad kurup ruh ïa ki tiar ki tar ba donkam.
Ka ïingbishar kala bthah ruh ba u DC bad SP ka EJH, ki dei ban wan mih hi dalade ha ka 9 tarik Rymphang 2026 ha ka por 10:30 baje mynstep hakhmat ka ïingbishar, ha ryngkat ki jingbatai ba bniah ïa ki kam ba la leh bad ban ai ïa ki daw balei ba ïohlad ka jingtih dewïong beaiñ”.
La bthah ïa ki bor khmih ba kin ai ka jingïarap ha ka liang ka jingsumar ïa ki briew kiba shah ktah bad ban wan mih dalade hakhmat ka ïingbishar ha ka 9 tarik Rymphang, ryngkat ki jingbatai ba bniah ïa ki kam ba la leh.
“Lada kam don ka jingbud ryntih, ki hukum kin sa nang mih,” maham ka ïingbishar.
