Ngi ki briew hangne ha pyrthei ngi shong ngi sah bad ngi im lyngba ka bor jong u Blei. La kiba long niam ne ki bym long niam ruh ki tip bad ki ieit ïa u Blei. Ym ba ieit Blei tang kiba don ha ki balang bad ki niam bapher bapher. Ki bym don ha ki niam ki ieit kham bha ïa u Blei ban ïa kiba don ha ki jait niam bapher bapher. Namar u Blei u long u Mynsiem. Kumta kiba long niam bad ki bym long niam ruh ki ioh katjuh ïa u Mynsiem u Blei. Namar lada ngim don Blei ngi la long kiba ïap. Namar kiba ïap kim tip eiei shuh namar ki la duh noh ïa u Mynsiem uba long u Blei. U Blei u long u Mynsiem te ka dei ïa ngi ban mane ïa u ha ka mynsiem bad ha kaba shisha (Bible). Kum ka jingïap ruh ka don ha baroh ki briew kiba long niam bad ki bym don niam ruh. Ym dei ba ïap tang ki bym don niam. Kiba long niam ruh ki ïap kumjuh man la ka sngi kum ki bym don niam. Namar ïa ka jingim bad ka jingïap jongngi ki briew ka shong ha ka mon u Blei, ym don ba lait wat lada phi don ha niam kaba heh ne kaba rit ruh. Kumjuh ruh don ba lait wat lada phim don ha kano kano ka niam ruh. Namar u Blei u la thaw ïa u briew, u khlem thaw ïa ka niam. ïa ka niam la thaw da u briew.
C. B. Iawphniaw
