Shillong, Rymphang 06
Ki don haduh saw ngut kiba mynsaw kiba dei ki Nepali, 2 ngut na Assam bad uwei uba sah ha Khliehriat kiba dang shitom jur namar ka jingbthei ka krem dewïong beaiñ ha Thangsko, East Jaiñtia Hills District kaba la jia ha ka 5 tarik mynta u bnai.
Kine ki saw ngut ki Nepali ki long u Korna 46 snem ka rta, u Bom Nagar 44 snem ka rta, u Lalit Magar 40 snem ka rta bad u Nor Bahadur 36 snem ka rta, katba ki ar ngut na Assam ki long u Deb Malakar 25 snem ka rta, u Jamil Ahmed 36 snem ka rta kiba dang shah sumar ha NEIGRIHMS Hospital Shillong, katba u Shanki Shylla 35 snem ka rta uba na Khliehriat u shah sumar ha Nazareth hospital Shillong.
Kumban shu pynkynmaw ïa kine kiba mynsaw la wanrah ha ka por janmiet sha kine ki jaka sumar ha Shillong, katba ïa ki 18 tylli ki metïap la ïoh sei bad ha ka sngi Thohdieng la ïoh sei sa 4 ngut na ka krem dewïong kaba la bthei.
Haduh ban da thoh ïa kane ka khubor, ki pulit SDRF bad ki NDRF ki dang bteng ban wad sa ïa kiwei pat kiba dang jah rngai.
