Shillong, Rymphang 06
Ka Khasi Students’ Union ka pynpaw ïa ka jingsngewkhia halor ka jingbym shngaiñ shuh ha ka ïaid ka ïeng ki nongleit nongwan khamtam ki khynnah skul kiba dei ban ïaid narud ka kynroh u mot Kiang Nangbah ba don mar pyrshah jong ka Civil Hospital Shillong namar ka jingpynlong jaka shong dih drok kiba wan shim dawai ha Civil Hospital.
Na ka jing ujor jong ki paidbah nongleit nongwan ka KSU Laban Circles ha ka jingïalam u samla Jason Laloo ka la leit ban ïakynduh ïa ka Surgeon Superintendent jong ka Civil Hospital Shillong ban pynsngew ïa ka jingïoh jingujor ki paidbah ba katei ka jaka kam long shuh kaba shngaiñ.
Haba kren sha ki nongthoh khubor u Samla Jason Laloo u la ïathuh ba ha ki taïew ba la dep uwei u rangbah ba ïaid lynti na katei ka bynta u la shah bat ha kawei ka kynthei ryngkat bad ki shynrang kiba shong ha katei ka jaka bad kila dawa ba u dei ban ai ïa ki jingdon jong u baroh, da kaba ki la byrngem ïa u lada um ai, kin hylla briew da kaba kynnoh ba utei u rangbah u leh ki kam kumne kumtai ïa katei ka kynthei briew.
U la ïathuh ba lehse ki don katto katne kiba wan shisha ban shim dawai napoh Civil Hospital hynrei ki don pat kiba shim kabu ïa katei ka jaka ba ki shong da kaba aidaw ba ki wan ban thied bam na ki dukan ba don harud surok, pynban ki pynlong ruh ïa katei ka jaka kum ka ktem ïakhaïi ïa u drok bad kum ka jaka ban ïoh buit kumno ban pynpoi drok sha kiwei ki bynta ka nongbah Shillong.
Ha ka jingïakynduh ïa ka Superintendent, ka KSU ka la kyntu ban bthah ïa kiba leit shim dawai (detoxification) hapoh Civil ba kim dei ban shong ha katei ka jaka, hynrei ba kin leit noh sha ïing tang mar ïadep shim dawai, namar ka jingdon jong ki ha katei ka jaka ym tang ba ka pynsyier ïa kiba ïaid ba ïeng hynrei kaba la isaitmet shikatdei.
U la bynrap ba ka Superintendent ka la kular ba kan shimkhia bad ban rah ruh sha ka Sorkar halor kane ka mat bad u la ban jur ba ka Sorkar ka dei ban shimkhia bha haba ïadei bad ki nongkhaïi drok kiba heh ha ka Jylla khnang ban lah ban jop ha ka jingïakhun ban pynduh jait ïa u drok ha nongbah Shillong bad ha ka Jylla.
Ha kane kajuh ka sngi ka KSU Laban Circle ka la beh ruh ïa ki briew kiba shong ha ka kynroh u mot Kiang Nangbah kaba dei ruh ka jaka ba kyrpang jong ka seng bad ka la buh ruh da ki (signboard) lane ki jingthoh ba maham ba katei ka jaka ka dei ka jaka bym bit ban dih duma lane ka ‘No Smoking Zone’.
