Nongstoiñ, Rymphang 06
Ka tnad pulit jong ka West Khasi Hills kala shimkhia mardor ha kaba ïadei bad ka jingsaphriang ka dur khih ha ki rynsan social media kaba pyni ïa ka jingïashoh ïa dat jong ki kynhun ki khynnah samla ha Nonbah jong ka sor Nongstoiñ.
U Bah H Kharkongor, Superintendent of Police ka West Khasi Hills u la ong ba ha kaba ïadei bad ka jingsaphriang ka dur khih ha ki rynsan social media kaba pyni ïa ka jingïashoh ïa dat jong ki kynhun ki khynnah samla ha Nonbah ha Nongstoiñ, ki pulit ka West Khasi Hills District ki la shimkhia ïa kane ka kam bad la register ruh ïa ka ‘suo moto case’ ha thanad Nongstoiñ da kaba pynngat ïa ki kyndon bad ka jingtohkit kala ïaid shakhmat.
U SP u la ong ruh ba katei ka jingjia ka dei kaba la jia ha ka miet jong ka 24 tarik Kyllalyngkot, 2026 na ka daw jong ka jingïania hapdeng ki ar kynhun kaba la wanlam ruh sha ka jingïa shoh ïa dat kaba la i shyrkhei.
Shuh shuh u la ong ruh ba ïa u samla uba la mynsaw na katei ka jingjia, la lah ban ithuh bad u la don hapdeng ka jingshah sumar bad na ka liang ki pulit ki la ïoh ruh ban shim ïa ka jingtohkit na ki briew kiba ïohi ïa katei ka jingjia.
U SP u la ong ruh ba haduh mynta baroh ki briew kiba ïa don bynta ha katei ka jingjia la lah ban ithuh lut bad la shim kam ruh katkum ka aiñ.
U la kyntu ruh ba lada don kino-kino ki jingsuba lane ki jingtip kaba lah ban ai ka jingïarap ïa ki pulit ban tohkit ki lah ban phone ha kine ki number, Police Control Room 9366498499, lane Helpline Number 122 lane da kaba shu wan mih sha thanad.
U la ong ruh ba na ka liang ki pulit kin nang shimkhia ban tehlakam ïa kino-kino ki briew kiba pyrshang ban thaw jingkulmar bad pynthud ïa ka suk ka saiñ hapoh ka District, bad na ka liang ki pulit kila maham ruh ba nangne shakhmat lada lap kin pynshitom katkum ka aiñ.
