Shillong, Rymphang 06
Ka Hynñiewtrep Integrated Territorial Organisation (HITO) ka dawa ïa ka Sorkar Pdeng ba ka dei ban pynbeit mardor ïa ka jingtih dewiong be-aiñ ha East Jaiñtia Hills District, kaba la don ruh ka jingjia ïap bun ngut ki briew na ka jingbthei u bom dynamite ha ka krem dewiong ha Thangsko kaba la jia ha ka step sngi Palei.
Ha ka sngi Thohdieng ka HITO ka la leit ban ïakynduh bad phah jingthoh sha u Lat ka Jylla Meghalaya u Chandrashekhar H. Vijayashankar ba un shimkhia lem ban ban pynsngew sha ka Ministry jong ka Sorkar Pdeng ban wanrah da ka jingtohkit Central Bureau of Investigation (CBI) khnang ban lah ban tip ïa kiba donkti ha kane ka jingjia bad ka jingtih dewïong be-aiñ.
Haba kren sha ki lad pathai khubor, u Bah Donbok Dkhar President HITO u la ong ba ka jingpynbna jong ka Sorkar Pdeng bad Sorkar Jylla ban ai jingïarap sha ki lanot kiba ngat ha kane ka jingjia, ka seng ka dap da ka jingsngewkhia namar ym pat lah ban tip thikna ba kitei ki lanot la ki dei shisha ne em ki nongshong shnong jong ka Ri India. Da kaba u la kdew ba kum kitei ki jingjia ki la jia bunsien bad ka ju jia ruh ba kiba ngat ha kum katei ka apot ki dei ki suba nong Bangladesh bad kiwei.
U Bah Donbok u la kynnoh ba lada khlem donkti ka bor Sorkar, ka jingtih dewïong be-aiñ kan nym lah long satia bad ka dei ruh ka jingleh matlah ka Sorkar Pdeng ban pynbeit ïa kane. Da kaba u la kdew ba ka NGT ka la khang ïa ka jingtih dewïong naduh u snem 2014, hynrei hadien jong kane kiba kum kine jingjia ki la ju jia ha ki snem kiba la dep, kaba pynpaw ba ka don ka jingtih dewïong be-aiñ ha ka Jylla Meghalaya.
U la kynthoh ba ka jingpynbna ka Sorkar Pdeng ban ai jingïarap sha ki lanot ka paw shai ba ka tip ïa ka jingdon ka jingtih dewïong be-aiñ ha ka Jylla hynrei ka jingai jingïarap ïa ki lanot ka long tang ban tap eit-miaw ban pyni ba ki sngewlem.
Shuh-shuh u la ïathuh ba haba ïadei ka jingjia ha Thangsko ka HITO ka la wad jingtip ba bniah bad kaba jia ha ka step Sngi Palei ka dei kaba la shu trei tang ban ïohnong khlem da bud ïa ka rukom tih dewiong ha ka juk mynta bad ka jingïohnong kaba mih na u dewiong ka leit ha ki riew shimet, hynrei u la pynpaw ka jingsngewdiaw haba jia kum kine ki jingjia ba sngewsih ka Sorkar ka siew bai lut ksan na ka pisa paidbah.
U la pynrem jur ïa ka jingdonkti ka Sorkar haka ban tih dewiong be-aiñ bad dawa ruh ba u Myntri Rangbah ka Sorkar Jylla u Conrad K Sangma u dei ban hiar shuki khang ba lada wan ka jingtohkit CBI ruh ka jingtohkit kan long kaba ïaid laitluid.
