Shillong, Rymphang 06
Ka India ka la bteng ban rah ïa ka nam lahduh kaba hynriew ha ka U-19 Cricket World Cup, hadien ba ka la pynliem noh ïa ka England da 100 run ha ka jingïakhun final kaba ka long ha ka sngi Thohdieng ha Harare.
Kane ka long ka jingjop kaba pynsah nam ïa ka India hapoh ka jingïalam u Ayush Mhatre, namar ba ka la buh ïa ka rekod ha ka pyrthei na ka bynta ka jingjop kaba heh tam ha kaba ïadei bad kane ka jingïakhun phainal jong ka U-19 World Cup.
U Vaibhav Suryavanshi, uba dang 14 snem ka rta, u la buh ïa ka nongrim jong ka jingjop ka India, da kaba u la lah ban khyrwit ïa ka spah run kaba 175 na ki 80 bol na ka bynta ban pynlong ïa ka kynhun ban kynjoh sha ka thong da kaba kamai 411 run bad shah pynhap 9 wiket ha ki 50 over. Hynrei ka England ka la lah ban pynpaw ïa ka jingtbit da kaba kamai 115 run na ki 67 bol ba la ïoh da u Caleb Falconer, hynrei ha kaba kut ka la shah pynkhyllem baroh ki nongtied.
Kumba ka paw ka India kam shym la shah rem wat tang shisien ruh ha kane ka jingïaid lynti hashwa ba kan khur ïa ka trophy nam lahduh.
Hadien ba la jop ïa ka kynting pisa, u kapten ka kynhun u Ayush Mhatre u la jied ban tied nyngkong. Te kumta kane ka kynhun ka la lah ban ïalehkai bha lyngba u Vaibhav Sooryavanshi. Kane ka jingkyrshan lang da kiwei pat ki nongtied ka la pynlong ïa ka India ba kan kynjoh sha ki 400 run.
Haba wan beh ïa ka thong, ka England ha kaba sdang ka la pyrshang ban ïalehkai bha lyngba u Ben Dawkins, Ben Mayes bad u kapten u Thomas Rew na ka bynta ban kynjoh sha ka thong ha ki 20 over. Hynrei ka England ka la ïakynduh jingeh hadien ka jingshah pynkhyllem noh u Rew. U Caleb Falconer bad u James Minto ki la pyrshang ban pynkhie im biang ïa kane ka kynhun ha kaba ki la lah ban kynjoh sha ki 92 run ha ka jingïatied lang, bad u Falconer u la tied 115 run na ki 67 bol. Hapdeng kane ka jingïakhun, ka England kam shym la lah ban kynjoh sha ka thong bad ka la mad ïa ka jingshah rem ha ka India.
