Khliehriat, Rymphang 06
Arngut ki briew kiba la suba donkti ki la shah kem noh ha kaba ïadei bad ka jingjia bthei dynamite hapoh kawei ka par tih dewïong beaiñ ha Mynsyngat ha ka thaiñ Thangsko, East Jaiñtia Hills, pyntip u Myntri ka tnad Revenue & Disaster Management u Bah Lahkmen Rymbui ha ka 6 tarik Rymphang.
U Bah Lahkmen uba la leit jurip sha katei ka jaka tih dewïong ha ryngkat u Myntri Sorkar u Bah Wailadmiki Shylla, ka MLA ka thaiñ Kong Santa Mary Shylla lem bad ki heh ophisar u la ong ba mar ïa ïoh jingtip halor katei ka jingjia kaba la jia ha ka 5 tarik Rymphang, ki bor district ki la pynkhreh mardor ïa ki kynhun ai jingïarap.
U pyntip ruh ba ki ophisar na ka district kynthup ïa u Block Development Officer bad ka kynhun ai jingsumar ki la her mar mar sha katei ka jaka, katba ka kynhun na ka State Disaster Response Force (SDRF) bad National Disaster Response Force (NDRF) ki la wan poi ha kane ka district na ka bynta ki kam ai jingïarap. Ha ka por ba kine ki kynhun ki la wan poi ha kane ka jaka la ïoh ban tam ïa ki 18 tylli ki metïap, katba phra ngut kiwei pat ki la ngat ha ki jingmynsaw.
Ïa baroh ki metïap la pynkynriah noh shapoh Khliehriat Civil Hospital na ka bynta ban leh ïa kaba donkam katkum ka aiñ, katba ïa ki phra ngut kiba mynsaw, hynriew ngut la pynkynriah sha NEIGRIHMS, uwei sha Nazareth Hospital bad uwei sha Jowai, ong u Myntri.
U Bah Lahkmen u pyntip ruh ba ha ka step 6 tarik, ar kynhun na ka NDRF nalor ki ophisar bad ki doktor ki la wan poi ha katei ka jaka ban pynlong ïa ki kam ai jingïarap bad ban pynthikna ba yn ym don ki ban sahkut hapoh katei ka krem dewïong. Ha kane ka jingwad ki kynhun ai jingïarap ki la ïoh ban sei sa ïa kawei ka metïap ha ka por kumba 1:30 mynsngi.
U la ong ruh ba ki bor district ki la ïoh ban kem noh ïa arngut ki briew ïa kiba la suba ba ki dei kiba donkti ha ka kam tih dewïong beaiñ bad ka jingtohkit mynta ka dang ïaid shakhmat. U la ong ruh ba ka jingkem ïa ki briew kiba donkti kan dang ïai bteng lada donkam.
U la bynrap ba mynta ki la shim ïa ki sienjam ban kurup ïa katei ka par dewïong beaiñ bad ïa ki tiar ki tar da kaba ban jur halor ka jingdonkam ban khanglad ïa kiba kum kine ki jingjia hadien habud.
U Bah Lahkmen u la pynpaw ruh ka jingsngewnguh ïa u Myntri Rangbahduh ka ri uba la pynbna ïa ka song jingïarap sha kiba haïing hasem jong ki lanot bad pyntip ba na ka liang u Myntri Rangbah ka Jylla ruh u la bthah ïa u ban leit jurip mardor sha katei ka jaka bad ban pynthikna ban shim ïa baroh ki sienjam ban pyndep kloi katba lah ïa ka kam ai jingïarap.
Ki kam ai jingïarap bad pyllait im ka dang ïaid shakhmat, ha kaba ka kynhun na ka NDRF, SDRF, Pulit, Magistrate bad ki bor district ki la don ha kane ka jaka.
