Shillong, Rymphang 06
Na kawei ka sngi sha kawei pat, ki kam tuh kam thiem ki la nang ïai bteng bad ïa kane lah ban sakhi na ka jingshah tuh jong ki arshaka, shah prong tuh jong ki ïing, bad ki jingshah tuh jong ki tiar na ki jaka bapher bapher kaba la jia ha kine ki sngi.
Katkum ka khubor kaba la ïoh na ki pulit la ong ba ha ka step 5 tarik mynta u bnai, ki runar bym lah ban ithuh ki la tuh ïa kawei ka arshaka kaba don ïa u registration number ML05-AC-3792 na Shyiap Pdengshnong, Shillong.
Ha kawei pat ka khubor, u Jose Roberto Lyngdoh Nonglait u la ujor sha ki pulit ba ha ka 4 tarik mynta u bnai, ki runar bym lah ban ithuh ki la tuh ïa ka arshaka jong u, kaba don ïa u registration number ML05-AA-1465 na Mawiong Rim, Shillong.
Ka Shristi Baheti ka la ai ka jingujor ba ha ka 4 tarik mynta u bnai, ha ka por kumba 9.15 baje mynstep, ki runar bym lah ban ithuh, ki la tuh ïa ki lai tylli ki headphone kiba shong shongdor kumba T.10 hajar na ka jaka sah jong ka, kaba don ha Nongrah, Shillong.
Ka Heena S Sangma ka la pyntip sha ki pulit ba ha ka miet jong ka 4 tarik mynta u bnai, ki runar bym lah ban ithuh ki la tuh ïa ka tape napoh ka kali jong ka, kaba la pynïeng hajan jong ka Central Pool, Lumpyngngad, Shillong.
Na ka liang jong u Pukhraj uba na Malgaon Nagaur, Rajasthan u la ai ka jingujor ba ha ka 5 tarik mynta u bnai ha ka por kumba 3.15 mynstep, ki runar bym lah ban ithuh ki la tuh ïa ka arshaka jong u, kaba don ïa u registration number ML05-AB-5034 na Pomlum, Upper Shillong.
Na ka liang jong ka Snigdha Roy ka la ujor ba ha ka 2 tarik mynta u bnai, ki runar bym lah ban ithuh ki la tuh ïa ka water pump, ar tylli ki mashin ot nar, bad kiwei ki tiar na ka kudam jong ka, kaba don ha Tura, West Garo Hills.
Katba u Addl. Chief Engineer (Distribution), West Zone, MePDCL u la ai ka jingujor ba ha ka 30 tarik jong u bnai ba la lah, ki runar bym lah ban ithuh ki la tuh ïa ka ACSR (Squirrel) conductor kaba rim kaba shong dor T.46,889/- napoh ka store yard jong ka ophis jong u, ha Tura, West Garo Hills.
