Shillong, Rymphang 06
Ka State-BJP ka la kyntu ïa ka Sorkar Jylla ban shim ïa ka sienjam ban khang ïa baroh ki rukom tih par be-aiñ bad ban pyntikna ba kito kiba donkti ha kum kine ki jait kam kin ngat ha ka jingpynshitom kaba tyngeh katkum ka aiñ.
“Ngi kyntu ïa ka Sorkar Jylla ban sdang noh mardor ïa ka sienjam ban khang pyrshah ïa baroh ki jait jingtih par be-aiñ bad ban pyntikna ba baroh kiba donkti ha kum kine ki kam kin mad ïa ka jingpynshitom kaba tyngeh tam katkum ka aiñ. Ngi kum ka Jylla bad ka imlang-sahlang ngim lah shuh ban shu leh matlah ïa ki jingma kiba lah ban mih na ka jingtih dewïong be-aiñ bad ka bym dei katkum ka juk stad saian kaba pynmyntoi tang ïa khyndiat ngut ki ‘riew bym hok bad kaba buh jingma pat ïa ka jingim jong kiba bun,” ong u Nongaiktien ba Rangbah ka BJP, Bah M. Kharkrang ha ka kyrwoh ha ka Sngi Thohdieng haba pynpaw ïa ka jingsngewsih jur halor ka jingjia ba dang shen ha East Jaiñtia Hills, kaba la ïalam sha ka jingduh noh ïa 18 ngut ki mynsiem briew.
“Ngi, na ka liang ka BJP-Meghalaya ngi sngewsih jur halor ka jingïap ba khlem dei por jong ki nongbylla kiba duna ka ïoh ka kot bad ngi kner ïa ka jingsngewlem sha ki bahaïing hasem jong kiba la khlad noh, sha ki briew kiba la duh noh ïa kiba ieid ba thoiñ jong ki ha kane ka jingjia,” u la ong.
Ka seng ka la pdiang sngewbha ïa ka jingpynbna ban siew bai lutksan kaba T. 2 lak sha ki bahaïing-hasem jong ki lanot da u Myntri Rangbahduh ka ri, u Narendra Modi, da kaba pynpaw ïa ka jingsngewnguh halor kane ka sienjam kaba kloi.
“Kane ka jingjia ba sngewsih ka lah ban pynkyndit ïa ki lad pathai khubor jong ka ri bad kiba shabar ri kumjuh hynrei ngi, na ka liang ha ka BJP-Meghalaya ngi la ju maham bunsien ba ka jingtih par be-aiñ ka dei tang kawei pat ka kyrteng jong ka jingma kaba ap ban jia,” la ong u Bah Kharkrang.
Ka BJP ka dawa ruh ba ka Jylla Meghalaya ka dei ban weng noh shi syndon ïa ka jingsniew na ka jingtih par be-aiñ, da kaba pynpaw ba dang donkam shuh ban leh eiei nalor ka jingkem ïa u trai par.
