Shillong, Rymphang 06
Ha ka sngi Thohdieng sa hynñiew tylli ki metïap la ïoh ban sei bad kaba la pynkiew ïa ka jingïap briew baroh sha ka 25 ngut, ha ka jingjia bthei bom dynamite ha ka par tih dewïong beaiñ ha Mynsngat, Thangsko, East Jaiñtia Hills kaba la jia ha ka sngi Palei.
Lah ban kdew ba ha ka sngi Palei, ka la don ka jingjia bthei bom dynamite ha katei ka par tih dewïong beaiñ bad kane ka la pynlong ïa ka jingwan hiar jong kiba bun tylli ki kynhun ïarap ne ki agency ba kynthup ka State Disaster Response Force, Special Rescue Team, bad National Disaster Resp-onse Force ban pynlong ka jingwad ïa kiba sahkut shapoh.
Ka Director General of Police ka Kong I Nongrang ka la ong, “Ka jingwad ka dang ïaid shaid-shaid mynta bad ka kynhun ai jingïarap (NDRF, SDRF, SRT) ki dang pyrshang katba lah ban lap ïa kiwei pat ki lanot bad ban pyndep ïa ka jingithuh kham kloi kat kaba lah,” kala bynrap.
La ong ba ha kane ka jaka la phah ïa ka kynhun ki nongsumar bad ki kali kit nongpang, ha kaba la pynkhreh lypa ruh ïa ki shipai.
Baroh kiba ïap kila kynjoh sha ka 25 ngut, bad na kitei 17 ngut dei kiba la ithuh bad aiti sha kiba haïing hasem jong ki hadien ba la pyndep ïa baroh ki jingdonkam, ong u SP ha u kyrwoh.
Ha kawei pat ka liang u Superintendent of Police ka East Jaiñtia Hills, u pyntip ba ka kynhun ai jingïarap ha kane ka sngi kala lap biang sa ïa 4 tylli ki metïap napoh ka par hynrei ki lai ngut kiwei pat ki dei kiba ïap hapdeng ka jingsumar ha ki hospital ha Shillong.
U pyntip ba uwei u la ïap hapdeng ka jingsumar ha NEIGRIHMS, 2 ngut kila ïap na ka jingmynsaw bad la wanrah ïa ki met da ki bahaïing sha Civil Hospital, Khliehriat bad Jowai.
Ha kaba ïadei bad kane ka jingjia, kaba haduh mynta ka la shim ïa ka jingim ki 25 ngut ki briew, ki pulit ki la kem noh ïa ki 2 ngut ki briew kiba la kynnoh donkti ha kaba pynïaid ïa kane ka kam.
Halor ka suo moto FIR ba la buh hapoh thanad Khliehriat, u SP u la pyntip ba la kem ïa ki arngut ïa kiba la suba ba ki dei kiba donkti ha ka kam tih dewïong beaiñ kita ki dei u Forme Chyrmang (36 snem) na Jalaphet Pyrdung, East Jaiñtia Hills bad Samehi War (42 snem) uba na Sutnga Pohwailong, East Jaiñtia Hills bad la pynngat ïa ki hapoh ka Section 105/118(2)/3(5) BNS ryngkat ki Section 21/21(1) ka Mines and Minerals (Development and Regulation) Act bad Section 3 ka Explosive Substances Act.
Ïa kine ki arngut la ïalam tian bishar hakhmat ka ïingbishar kaba la ai bor ïa ki pulit ban set 3 sngi hapoh ka Police custody na ka bynta ban pynlong ïa ka jingtohkit kaba bniah.
U la ïathuh ba ka jingtohkit ka dang ïaid shakhmat ban ithuh bad ïoh kem ïa kiwei pat ki briew kiba don bynta ha kane ka jingjia.
