Kynnoh ka Kong Agnes ba donkti lang ka Sorkar Pdeng bad Sorkar Jylla halor ka kam tih dewïong beaiñ

Shillong, Rymphang 06

Ka Kong Agnes Kharshiïing kaba dei ka Social Activist ka la kynnoh ba dei kiba don ha ka bor ba ki ai lad ban pyntrei ïa katei ka par dewïong beaiñ ha Thangsko, kaba ki mynsiem briew ki la shu ïap hapdeng ka jingtrei bylla.

“Balei ka Sorkar kam lah ban tehlakam baroh shi katta halor kane ka kam tih dewïong beaiñ” la ong ka Kong Agnes haba kren sha ki lad pathai khubor ha ka sngi Thohdieng jong ka taïew.

Ka la kynnoh ruh ba ka Sorkar Pdeng bad ka Sorkar Jylla ki ïa don kti lang ha kane ka kam tih dewïong beaiñ, da kaba kdew ba tang ha ka por ilekshon ki lah ban ïa beiñ i wei ïa i wei hynrei ha ka kam tuh pat ki ïa tuh lang. “Ha nga hi, nga ong ba kine baroh ar ki ïa donkti lang ha ka kam beaiñ” la bynrap ka Kong Agnes.

Ka Kong Agnes ka la dawa ruh ba dei ban kem noh ïa kita ki briew kiba khapbrit ki khmat namar ba ki ailad ïa ka jingsniew. Lada kim ïa kem ïa ki briew kiba ai lad ban leh ïa kane ka kam beaiñ ka mut kam myntoi eiei ruh em ban shu kem tang ïa ki trai.

Haba kylli, ka Kong Agnes ka la kynnoh ba kane ka dei beit ka jingdon jingïadei hapdeng ki trai bad ka Sorkar.

Nalor kata, ka la ong ruh ba shibun ki trok kiba ju kit beaiñ ïa u dewïong hynrei ki pulit kim ju talasi ban peit bniah bad ki phah ïaid beit ïa ka surok ba ki dei ban ïaid.

“Mano ba lah ban tuklar ïa kaba dei hynrei kum kane ka jingjia ba haduh bun ki mynsiem ki la ïap ngi hap ban tuklar. Ngim kwah ba ki briew kin shu ïap namar haba ki ïoh bylla ki hap ban trei hynrei ban shu kbum pyntian beit da kata la dewïong kam lah ban long,” la ong shuh shuh ka Kong Agnes.

Namarkata, ka ong ba dei ban kem noh shuwa ïa kiba heh bad kiba don ha ka bor khnang ba baroh kan ïaid beit lut.