Shillong, Rymphang 06
U Myntri ka Sorkar Pdeng uba khmih ïa ka Ministry Coal & Mines u G Kishan Reddy u la ong ba ka jingïai bteng ka jingtih dewïong beaiñ ha Meghalaya ka dei ba don ka kynhun runar ne ki ‘Mafia’ kaba pynïaid ïa kane ka kam bad pyntip ruh ba ka Sorkar India kam don par dewïong satia ba treikam ha Meghalaya.
Haba kynthoh ïa ka jingjia bthei ba shim ïa ka jingim ki 25 ngut, u Myntri u la ong, “Ka jingjia kala jia ha ka par ba tih dewïong beaiñ ha Meghalaya. Bun ngut ki briew kila ïap. Ka Sorkar India kam don par dewïong satia ha Meghalaya. Pat don kawei ka coal block ban lilam haduh mynta. Ym don satia ki par PSU ne ki commercial ba don hangtei”.
U Myntri u la ong ba ïa kane ka jingtih dewïong beaiñ dei ban khmih bniah da ka Sorkar Jylla. Da kaba ong ruh ba ka Sorkar India ka la ju bthah ïa ka Sorkar Meghalaya ba ka dei ban leh tyngeh ïa kito kiba tih dewïong beaiñ ba long pyrshah katkum ka aiñ hynrei kine ki riew runar ne ki mafia ki dang ïai bteng ban tih beaiñ khlem da shah pynshitom.
“Ngi la ju thoh na ka por sha ka por sha ka Sorkar Jylla ban khang ïa ka jingtih dewïong beaiñ. Watla katta, ki mafia ki pynïaid ïa ki par dewïong ha kylleng ki jaka bad phah trei ïa kiba lui lui. Kane ka hap ban sangeh noh hapoh ka jingkhmih jong ka Sorkar Jylla. Kam dei ban don ka jingïapeiñ. Kum kine ki jingjia kim dei ban jia…ka jingtih dewïong beaiñ kam dei ban don,” u la ong.
U Reddy u la pynthikna ba u la pan ïa ka kaiphod kaba bniah na ka Sorkar Meghalaya halor kane ka jingjia bad kyntu ïa baroh ki Jylla ba kin pyntrei pyrkhing bha ïa ki aiñ tih par ban nym jia shuh kum kine ki jingjia ban duh ïa ki mynsiem briew.
