Shillong, Rymphang 06
U Bah P.T Sawkmie, MLA barim ha ka sngi Thohdieng u la ong ba ka Sorkar ka la dei ban pynsangeh shuwa ïa ki prokram Sorkar baroh kum ka dak ban burom ïa ka jingkhlad noh ki nongbylla tih dewïong hapoh krem dewïong, kaba la jia ha East Jaiñtia Hill District.
“Kane ka dei ka jingjia kaba sngew shyrkhei bad sngewsynei ïa kito kiba la ngat ha kane ka apot, khamtam kito kiba don ka jingïadei kaba ïajan bad ki,” ong u Bah Process.
U la bynrap, “Kane ka jingïap mynta ka dei kaba bun tam ha kaba da ki phew ngut la lap ïa ki met ïap bad ki pulit ki dang suba ba lah ba kin dang don shuh kiba ïap.”
Kumta haba ïadei bad kane ka jingjia basngewih u Bah PT Sawkmie u la phah ïa ka khubor sngewlem sha kiba haïing hasem, sha kiba don jingïadei bajan bad kine baroh.
Ha kajuh ka por u kyrpad ïa ka Sorkar Jylla bad ïa ka Sorkar Pdeng ba ka dei ban wad ki lad ki lynti kumno ban pynsangeh syndon ïa kane ka jingtih dewïong be-aiñ.
Kumban shu kdew kane ka jingjia basngewsih ka la jia ha ka shnong Thangsko, East Jaiñtia Hill bad tad haduh ka sngi Thohdieng ka jingïap ka la kiew sha ka 25 ngut.
