Shillong, Rymphang 06
Ka Hynñiewtrep Youths’ Council (HYC) watla ka sngewsynei ïa ki longïing kiba la shah ktah na ka jingbthei hapoh ka par dewiong ha Thangsko, hynrei ka pyrshah jur ïa ka Sorkar India bad ka Sorkar Meghalaya ïa ka jingpynbna matlah bad ka jingpynbna kloi ïa ka bai lutksan ïa kiba mad ka jingsngewsih ha katei ka jingjia.
Ha ka kyrwoh ba la phah da u Bah Roykupar Synrem, President ha ka sngi Thohdieng jong ka taïew u la ong “Ka jingsiew bai lutksan khlem ka jingpynshisha kam dei ka jingsngewsynei hynrei ka dei ka jingpyndonkam bakla ïa ka pisa paidbah ban pynkhuid ïa ka jingleh be-aiñ bad ban ai khusnam ïa ki jingjyrsieh ba buhrieh”.
U ong ba ka HYC ka kren shai ba ym dei ban pyllait ïa ka pisa paidbah lymda la pynshisha shuwa ïa ki jinglong tynrai, ka jinglong nong India jong u nongkhlad noh katkum ki kot ki sla bad ki sakhi, “Katkum ka jingtip ka jong ngi bun kidei kiba wan buhai shnong beaiñ bad ki nongbylla kim dei ki trai shnong, kiba bun na ki, ki lah ban ym dei wat ki nongshong shnong jong ka ri India”, la ong u Bah Roykupar Synrem.
“Ka jingai bai lutksan khlem da pynshisha kam dei ka jingleh isynei briew-ka dei ka jingbym kitkhlieh ha ka liang ka jingsynshar bad ka jingpyndonkam bakla ïa ka pisa paidbah” u la bynrap.
Shuh shuh u ong ba ka ex-gratia ka mut na ka bynta ki nongshong shnong ba pura, ym ban ai khusnam ne ban pynlong aiñ ïa ka jingtih dewïong beaiñ, ka jingwallam nongtrei be-aiñ ne ka jingsah be-aiñ. Kano kano ka jingsiew kaba la leh khlem da pynshisha kan pynshlur ïa kito kiba don bynta ha ki kam be-aiñ bad ïa ki nongwan buhai shnong be-aiñ.
Kumta u la dawa ban pynshisha ïa ka jinglong trai ri jong baroh kiba la khlad noh shuwa ban mynjur ïa kano-kano ka jingsiew bai lutksan bad ka jingtohkit ïa ki kam runar ban ithuh ïa ki trai par dewïong, ki kontraktor, kiba don shadien jong ka jingpynbthei be-aiñ bad ïa kiba ïalam ïa ki nongwan buhai shnong be-aiñ shapoh ka Jylla.
U la bynrap ba ka HYC ka pynpaw biang ba ka jingsngewlem kam lah ban pynduh ïa ka rukom treikam kaba dei bad ka aiñ. Ka Sorkar India bad Meghalaya ki dei ban shim ïa ka jingkitkhlieh ym ban shu hun tang ban paw khubor ban pyni ba ki kylluid mynsiem. “Lada Ym don jingithuh, ym dei u trai Ri India, ym don jingpynshisha-te ym dei ban ai ka pisa paidbah”.
