Shillong, Rymphang 06
Ka jingbthei ka krem dewïong ha Thangsko, East Jaiñtia Hills District ka la wan rah ïa ka jingkhlad jong ki nongtrei bylla kumba 19 ngut bad kiba la mynsw jur ki don 8 ngut, kynthup u wei u rangbah uba na Khliehriat.
Haba buddien halor kane ka khubor na ka liang u Nongsaiñ Hima u la leit sha NEIGRIHMS, Hospital Shillong ban pyrshang ïakynduh ïa ki bahaïing hasem jong ki briew kiba phah sumar na ka jingbthei ha katei ka krem dewïong.
Haba ïoh ban ïakren kyrpang bad ki bahaïing hasem jong u Bah Shanki Shylla, ki la ïathuh ba u Bah Shanki u dang shu sdang ban leit trei bylla ha katei ka par dewïong ha Thangsko hynrei ka la jia noh kane ka jingjia ba sngewsih.
Ki la ïathuh ruh ba u Bah Shanki u don 3 ngut ki khun bad ka kurim jong u ka don hapdeng ka jingshitom mynta.
“Ngi pynpaw ka jingsngewsih halor kane ka jingjia namar ba u Shanki Shylla u dang sdang ban leit trei bylla ha katei ka par dewïong dang mynta shi taïew eiei,” la ong ki bahaïing.
Shuh shuh ki la ïathuh ba u Bah Shanki u la tip briew mynta.
