Nongstoiñ, Rymphang 09
Ka ïingbishar u Special Judge POCSO Nongstoiñ ha ka 30 tarik u Kyllalyngkot, 2026 kala rai pynrem ïa uwei u briew ïa uba la tip kyrteng kum u Starling Syiemlieh halor ka jingdonkti ka jong u ban leh beijot ïa ki 2 ngut ki khynnah ba dang lung ka rta.
Ka kyrwoh khubor na u Bah HP Kharkongor, Superintendent of Police ka WKHD la ong ba katei ka jingjia la ïoh pdiang ïa ka jingujor ha ka 2 tarik u Jylliew, 2023 ha kaba ïa ka case la register hapoh thanad Shallang katkum ka case number 11(6)2023 U/S 506 IPC R/w Section 5 (1)(m)(n)/6 POCSO Act bad la shim tohkit da ka WPSI Nylla Eulalia Wanniang.
U Bah Kharkongor u la ong ruh ba ïa katei ka case la charge sheet da katei ka ophisar bala shim tohkit hapoh ki kyndon 5 (m)(n) 6 jong ka POCSO Act.
Nangta la ong ruh ba hadien bala bishar bniah lyngba ki sakhi sabut kiba la mih na ka jingtohkit, ka ïingbishar jong u Special Judge POCSO kala rai pynrem ïa utei u runar da kaba pynbna ban rai set along haduh 20 snem ryngkat ka kuna kaba un hap siew haduh 50 hajar tyngka bad lada um siew un ngat biang sa 6 bnai ha phatok hapoh ka kyndon 5 (m)(n) 6 jong ka POCSO Act.
