Shillong, Rymphang 09
Ka Catholic Bishop Conference of India (CBCI) kala pynkup burom ïa u Myntri Rangbah ka Jylla Conrad K Sangma nalor ki 19 ngut kiwei pat da ka CBCI National Award 2026.
Kane ka National Award ba dang shu pynmih thymmai, la ai ha ka sien ba nyngkong eh sha u Myntri Rangbah, Conrad K Sangma bad kiwei ki nongïoh khusnam ha ka jingïalang 37th CBCI General Body ba long ha ka sngi Nyngkong ha St. John’s Medical College, Bengaluru.
Ka CBCI National Award ka ai burom ïa ki riew shimet kiba la ai ïa ka jingshakri ba kyrpang sha ka Balang, ka imlang sahlang bad ka Ri, da kaba pynpaw ïa ka jinglong ba kordor ka Gospel bad ka jingnoh synñiang kaba kongsan sha ka burom briew, ka hok, ka pule dangle, ka jinglong nongïalam bad ka jingpynmih jingmut ba thymmai.
Lyngba kine ki khusnam, ka CBCI ka wad ban pynshlur ïa ki pateng ban wan ban pdiang ïa ka jingim jong ka jingaiti, ka jinglong ba janai, bad ka jingshakri kaba sngewrit, kaba don tynrai ha ki jinghikai jong ka Gospel bad ki jingmut jong ka riti synshar jong ka hok, ka jinglong parabangeit, bad ka burom briew ban tei ïa ka ri.
Haba kren ha kane ka jingïalang, u Myntri Rangbah ka Jylla Conrad K Sangma u la pynpaw ïa ka jingsngewnguh ïa ka CBCI bad ong, “Kane ka khusnam ba la pynmih da ka CBCI ka pynskhem ha ngi ïa ka jingngeit ba ka kam kaba ngi trei ka don ïa ka dor bad ka wanrah ïa ka jingkylla nalor ka pynshlur ïa ngi ban leh ïa kaei kaei ba ka Balang ka hikai ïa ngi.”
U Myntri Rangbah ka Jylla u la kubur ïa ka jingsynñiang jong ka Balang Katholik ha kaba saiñdur ïa ki samla khamtam ha ka thaiñ Shatei Lam-mihngi bad u la pynthikna ban ïatreilang bad ka Balang.
“Kine ki dei ki por ka jingtynjuh ba ki Balang kila ïakynduh ha ki bynta bapher-bapher jong ka Ri hynrei ngin ïatreilang,” u la ong bad kyntu ïa ki samla Katholik bad ki samla Khristan ba kin long ki nongïalam ym tang ha ka saiñ hima sima hynrei ha kiwei pat ki bynta bapher-bapher.
