Shillong, Rymphang 09
U Myntri Rangbah ka Jylla, u Conrad K. Sangma u la pynbna ïa ka rai jong ka Sorkar Jylla ban thaw da ka ‘Judicial Inquiry Commission’ ban tohkit halor ka jingjia ba sngewsih ha ka thaiñ Mynsngat-Thangsko, East Jaiñtia Hills, ha kaba 28 ngut ki nongtrei par ki la duh noh la ka jingim katba 8 ngut kiwei pat ki la mynsaw na ka jingbthei ha kawei ka par dewïong be-aiñ.
“Ka Sorkar ka la rai ban thaw ïa ka ‘Judicial Inquiry Commission’ hapoh jong ka ‘Commission of Inquiry Act’ ban tohkit halor kane ka jingjia ba sngewsih ba dang shen,” ong u Conrad ha ka jingthoh ha ka rynsan lad pathai ha ka Lah Sngi U Blei.
Ki arngut ki trai par kiba la tip kyrteng kum u Forme Chyrmang (36 snem) bad u Shamehi War (42 snem) ki la shah kem bad kin don ha ‘Police Custody’ na bynta 3 sngi.
Na ka liang ki bor ba dei khmih ki dang pynshisha ïa ki jingtip ba bniah, ban pyndep ïa ki rukom treikam ba ïadei bad ka jingpynithuh, bad ka jingbteng ban wad, ka jingtohkit, bad ki bynta ba ïadei bad ka aiñ.
Ka kyrwoh Sorkar ka ïathuh ruh ba la phah bran-bran ïa ki kynhun ai jingïarap ba kyrkieh, kynthup ïa ki bor distrik, ki pulit, State Disaster Response Force, bad National Disaster Response Force.
Ha kajuh ka por, la ïaid shakhmat bad ka jingwad, ka jingpyllait im, hapdeng ki jinglong-jingman kiba eh ban pyntikna ba baroh kito kiba shah ktah kin ïoh ïa ka jingsumar ha ka por kaba biang.
“Da kaba buh jingmut ïa ka jingkhraw jong kane ka jingjia, u Myntri Rangbah, Conrad K. Sangma u la pynbna ba yn thaw ïa ka ‘Judicial Inquiry Commission’ hapoh ka ‘Commission of Inquiry Act’ ban tohkit halor ka jingjia ba sngewsih kaba la jia ha Mynsngat-Thangsko,” la ong ka khubor.
“La pynbna ïa ka jingïarap ‘ex-gratia’ na ka bynta ki bahaïing hasem jong kiba la khlad noh, bad la ai ruh ka jingkyrshan ba ïai bteng sha kito kiba mynsaw,” la bynrap ka kyrwoh.
Ha kawei ka liang, u Symbud Myntri Rangbah ka Jylla, Bah Prestone Tynsong u la pyntip ba ka Sorkar kan sa aiti ïa ka jingtohkit sha ka Judicial Inquiry Commission.
“Wei ba la thung ïa u Chairman jong ka komishon, nga tikna ba kin sa ïaid shakhmat bad ka jingtohkit kumba ka dei ban long,” u la ong.
