France, Rymphang:
2 ngut ki nonglehkai ‘Ski’ ki la duh ei noh ïa ka jingim ha ka Sngi Saitjaiñ hadien ba utei u Lum thah jong ka France, u la twa bad ki thah kiba don ha utei u Lum ki la tuid bad tap ïa kitei ki 2 ngut katba ki dang ïa shangkai sngewtynnad ha katei ka sngi.
Katkum ka jingïathuh jong ki kynhun pyllait im na katei ka thaiñ, kitei ki arngut ki la khlad noh ha ka por mynstep jong ka Sngi Saitjaiñ hajan ka shnong Saint-Veran, kaba la tip kum ka shnong kaba jrong tam ha ki lum French Alps.
Kitei ki arngut kiba la khlad noh, ki kynthup ïa uwei uba la kha ha u snem 1997 bad uwei pat ha u snem 1991 bad ki ïadon lang na kajuh ka kynhun jong 4 ngut ki nongleit ‘skiing’ kiba shu ïaleit shangkai hi kumto, khlem da don nongïalam lynti, ha kaba ka utei u thah ha utei u Lum, uba sha ka phang Mihngi jong u lum Tete de Longet, u la twa bad ioh tap ïa kitei ki 2 ngut kiba sah shadien na kitei ki 2 ngut kiwei pat kiba la lait phet kham sha khmat.
La ong ba kitei kiwei pat ki arngut ki nongïalehkai ski kim shym la mynsaw, la bynrap biang u Lozac’hmeur.
Kumta, ka tnat ba dei khmih ka la bthah ba dei ban pyndep ia ka post mortem ba yn ioh ia ka jubab kaba shai halor ka jingkhlad jongki bad ban pynshisha ïa ka jinglong- jingman jong ka met jongki.
Namar la ong ba ka jingtwa ki Lum thah, ka la shim ïa ka jingim jong palat 20 ngut ki nongïalehkai ski ha kylleng ki lum Alps jong ka France, Switzerland bad Austria tad haduh kane ka samoi.
