Shillong, Rymphang 09
U Justice B.P. Katakey, uba khlieh ïa ka komiti ba la thung da ka Meghalaya High Court, u la pynpaw ïa ka jingsngewkhia kaba jur halor ka jingbthei ba dang shen ha East Jaiñtia Hills, da kaba maham ba ka ‘jingpyndonkam ïa u ‘dynamite” ha kiba bun ki kam tih dewïong be-aiñ, ka lah ban wanrah shuh ïa ki jingjia ba sngewsih – kaba la shim noh ïa 27 ngut ki mynsiem briew haduh mynta.
“Ka long kaba sngewsih shi kat dei namarba ki la sdang ban pyndonkam da u ‘dynamite’ na ka bynta ka jingthmu (ban tih dewïong be-aiñ). Hashuwa, kaei kaba ki ju leh ka long ba ki phah ïa ki briew ban rung, ban tih bad ban sei (ïa u dewïong) hynrei mynta ki la sdang ban pyndonkam da u ‘dynamite’ khnang ba kin lah ban tih kham bun u dewïong hapoh ka por kaba lyngkot,” ong u Justice Katakey.
“Haba phai sha ki kam be-aiñ kiba nga la ïohi ha lynti ban leit sha kata ka jaka bad kumjuh ïa ka rukom thymmai kaba ki la shim ban pyndonkam da u ‘dynamite’, nga tieng ba kum kine ki jait jingjia ki lah ban jia biang shen,” u la maham.
U la ban jur ba ki bor pynïaid distrik bad ki bor pulit ki don ka jingkitkhlieh ban ïada ïa ka jingim jong ki nongbylla ba lui-lui bad ki dei ruh ban leh eiei pyrshah ïa ki trai par dewïong.
“Nga la pynsngew sha u Deputy Commissioner bad u Superintendent of Police halor ka jingbym leh eiei. La lap ïa 27 tylli ki metïap. Phi don ka jingkitkhlieh ban ïada ïa ka jingim jong kine ki briew ba lui-lui. Kine ki dei ki nongbylla ba lui-lui, phi hap ban leh eiei pyrshah ïa ki trai par dewïong,” ong u Justice Katakey da kaba bynrap, “Ka bha eh ba ki la sdang ban leh eiei halor kane bad katkum kata, ki la ïoh kurup bun bah ki ‘detonator’ hapoh ka thanad Umpleng na kawei ka jaka kaba ki khot ka ‘Cement Bazaar’ bad na ka shnong Mynsngat, ki la ïoh ruh katto-katne ki ‘detonator’ kiba dei ban pyndonkam na ka bynta ki kam tih par.”
Na ka liang u Justice Katakey u la leit jngoh ruh ïa katei ka jaka ba jia ka jingjia ha ka 6 tarik u Rymphang bad u la sakhi ïa ka jingkynrei jong ki kam tih par be-aiñ. “Nga la poi ha katei ka jaka ba jia ka jingjia aksiden ha ka por 1 baje mynsngi ha ka 6 tarik u Rymphang bad nga la sngew kyndit ban ïohi ïa ki kam tih par be-aiñ kiba treikam ha man ki jaka, ym tang ha katei ka jaka hynrei wat ha baroh arliang jong ka surok kaba ïalam sha ka,” ong u Justice Katakey.
“Nga la kylli na ki nongtrei kiba la pynpaw ba ki la tih dewïong hangne la 16-20 snem,” u la ong.
U la ïathuh shuh-shuh ba kaba pynsngewsih ka long ba kane ka jia tang 10 kilomitar na Khliehriat, bad ym don ba ïohi ïa ka.
“Baroh ki lah ban ïohi ïa ka – lait noh tang ki bor ba dei khmih,” la kynthoh u Chairman ka komiti, da kaba pynpaw ïa ka jingduna na ka liang ki bor ba dei khmih.
Katkum ka jingong jong ki heh ophisar, la lap ïa 27 tylli ki met ïap, hynrei ki bahaïing ha sem jong ki briew kiba jah ki sheptieng ba ka jingïap ka lah ban kham bun.
Shuh shuh u la bthah ïa ki bor ba dei khmih kynthup ïa u Deputy Commissioner bad u Superintendent of Police ban kurup ïa ki tiar bad ban leh eiei, da kaba ban jur ban pynbeit ïa ka jingkitkhlieh bad ban pynngat ïa ki trai par ha ki kyndon jong ka aiñ.
U Justice Katakey u la pdiang sngewbha ruh ïa ka jingbthah jong ka Ïingbishar – ban phah wan mih hi dalade ïa u Deputy Commissioner bad u Superintendent of Police jong ka East Jaiñtia Hills da kaba ong ba ka dei ka sienjam sha ka lynti kaba dei.
Haba kylli, u Justice Katakey u la pynpaw ka jingsngewkhia ba ka jingpyndonkam ïa u ‘dynamite’ ha ka jingtih dewïong be-aiñ ka dei ka rukom kaba ju leh, da kaba kdew ïa ki jinglap na ki jaka bapher-bapher.
“Ka jingjia bthei ka dei ka sien kaba ar, bad nga tikna ba kiwei pat ki distrik ki lah ban bud ïa kane, kaba lah ban ïalam sha ka jinglong-jingman ba shyrkhei,” u la maham.
“Ki bor distrik ki dei ban leh da kaba tyngeh ban khanglad ïa kum kine ki jingjia,” la ban jur u Justice Katakey, da kaba kyntu halor ki lad ki lynti kiba tyngeh ban khang ïa ka jingtih dewïong be-aiñ ha Meghalaya.
