Shillong, Rymphang 09
Ka Ïingkashari Meghalaya High Court ha ka sngi Nyngkong jong ka taïew ka la khot hajir ïa u Deputy Commissioner, Manish Kumar bad u Superintendent of Police, u Vikash Kumar, na East Jaiñtia Hills District, kaba la shim Suo moto halor ka jingjia bthei ka krem dewïong beaiñ ha Mynsngat-Thangsko.
Kane ka jingjia bthei katei ka krem ka dei kaba la jia ha ka step jong ka 05 tarik u Rymphang, 2026, kaba la shim ïa ka jingim jong 28 ngut bad pynmynsaw 8 ngut ki nongbylla tih dewïong beaiñ ha katei ka jaka.
Haba kren sha ki lad pathai khubor u Vikash Kumar, Superintendent of Police ka East Jaiñtia Hills District u la ong ba ka jingbteng ban wad ïoh dang don kiba sahkut ha krem dewïong ka dang ïaid shakhmat watla khlem lap metïap shuh haduh mynta.
“Ka Ïingkashari ka la shim mukotduma halor kane ka jingjia bad kaba ngi hap ban wan mih dalade hi sha Ïingkashari,” u la ong.
Haba ïadei bad katei ka jingjia u la ong ba ki pulit bad kynhun ai jingïarap ki dang don ha ka jaka ba jia ka jingjia ban bteng ïa ka jingwad.
Ar ngut ki trai par dewïong kiba la shah kem ki kynthup u Forme Chyrmang ba 36 snem ka rta bad u Shamehi War ba 42 snem ka rta bad shah set ha ka Police Custody ba lai sngi.
U Myntri Rangbah ka Jylla Meghalaya, u Conrad K Sangma u la pyntip ba ka Sorkar Jylla ka la thaw da ka Judicial Inquiry Commission hapoh Commission of Inquiry Act ban tohkit bniah halor kane ka jingjia bad ka Ïingkashari ruh ka pynlong ka jingpeit bniah.
“Haba ïadei bad katei ka jingpynbthei bom ha ka par dewïong beaiñ ba jia ha ka 05 tarik u Rymphang, ka Ïingkashari ka la shim mukotduma bad khot ïa u DC bad SP ka EJH ban wan mih dalade ha Ïingkashari. Namar kane ka kam ka dang don hapdeng ka jingbishar ka Ïingkashari, ngim lah ban kynthoh eiei palat ïa kane ha kane ka khyllipmat” ong u Vikash Kumar.
Namarkata, u la pyntip ruh ba ka jingtohkit ka dang ïaid shaid-shaid hapoh ki kyndon jong ka aiñ.
Shuh shuh u la pynpaw ba ka jingtohkit ka dang ïaid shaid shaid bad ïathuh ba la kem ruh ïa katto katne ki briew bad ka jingtohkit ka la ïaid ha ka lynti kaba dei. “Ngi ngeit skhem ba yn sa wanrah ïa ka, sha ka jingkut kaba thikna,” u la bynrap.
Haba ïadei bad ka jingïaid ka jingbishar ka Ïingkashari, u Vikash Kumar u la pyntip ba ïa ka sien ban leit hajir biang kan sa shai hadien ba ka Ïingkashari ka la pynmih ïa ka hukum. “Ngi khmih lynti ïa ka hukum ban mih mynta ka janmiet. Tang hadien kata ngin sa lah ban pynthikna ïa ka sngi ban leit hajir biang” la bynrap shuh-shuh u Vikash Kumar.
Haba ïadei bad ka jingneh ka jingïawad ïa ki briew, u SP u la ong ba kane kan shong ha ki jingaiktien na ki agency kiba don bynta kynthup ka National Disaster Response Force (NDRF), State Disaster Response Force (SDRF), bad kiwei ki kynhun ai jingïarap.
