Khliehriat, Rymphang 09
Ka jingïap na ka jingbthei dynamite hapoh ka par tih dewïong beaiñ ha Mynsngat, kaba don ha ka thaiñ Thangsko, East Jaiñtia Hills kaba la jia ha ka 5 tarik Rymphang ka la kiew sha ka 28 ngut hadien ka jingkhlad noh jong uwei uba mynsaw, katba ka jingdon jong kiba mynsaw ka long 8 ngut.
Une uba khlad u dei uba tip kyrteng kum u Raju Tamang, uba don hapdeng ka jingshah sumar ha NEIGRIHMS hospital, ha kaba namar ka jingjur jong ka jingmynsaw u la khlad noh ha ka por kumba 6:21 janmiet ha ka sngi Nyngkong, la pynthikna u Superintendent of Police Vikash Kumar.
U Deputy Commissioner ka East Jaiñtia Hills u pyntip ba ki kam ai jingïarap hapoh ka krem tih dewïong ka dang ïai bteng haduh ha ka 9 tarik Rymphang bad sangeh haduh 5.00 baje janmiet da ka jingïashim bynta jong ki kynhun na ka NDRF, SDRF, Special Rescue Team (SRT), Pulit bad ki bor District.
Ka bor pynïaid District ka East Jaiñtia Hills ka la pynjur ïa ka jingkhynra pyrshah ïa ka jingtih dewïong beaiñ da kaba thung ïa ki kynhun kaba kynthup ïa ki Executive Magistrate, ki pulit, ophisar na ka Directorate of Mineral Resources (DMR).
Ha ka jingkhynra ka kynhun ka la ïoh ban kurup noh haduh kumba 6 MT u dewïong beaiñ hapdeng ka Lumshyrmit bad ka thaiñ Cham Cham, 10 MT harud surok hajan Cham Cham bad Mukhaialong, 2 MT harud surok hapdeng ka Mutong bad ka shnong Mukhaialong bad 20 MT na ka shnong Pynthorsale.
Ha kane ka jingkhynra la pynpra ruh ïa ki ïingsher dara shipor ba la pyndonkam ha kaba ïadei bad ki kam tih dewïong beaiñ, bad la mudui ruh da ka ejahar halor ki kam tih dewïong beaiñ, bad ka jingshim ïa ki sienjam katkum ka aiñ ka la ïaid shakhmat.
Na ka liang ka Sorkar ka la pynkhreh ban siew ïa ka bai lutksan kaba kot T.24 lak sha ki phra ngut ki lanot kiba la ngat ha kane ka jingbthei hapoh ka par dewïong ha Mynsngat, Thangsko bad ïa kaba yn bteng ban siew hadien ba la aiti ïa ki kot ki sla bad ki jingpynshisha na kiba haïing hasem jong ki lanot.
U District Magistrate ka EJH u la pynjari da ka hukum hapoh ka kyndon 163 BNSS ban pynthikna na ka bynta ka jingshngaiñ jong ki paidbah bad ruh ban pynsuk ha kaba ïadei bad ki jingtreikam kiba dang ïaid shakhmat.
La kyntu ruh ïa ki paidbah ba kin ai ka jingïatreilang bad ki bor Sorkar, ban kiar na ki kam tih dewïong beaiñ bad ban kiar ban leit sha ki jaka ba don jingma ne ki jaka tih dewïong ba la khang pyrshah.
