Shillong, Rymphang 09
Ka Ïingbishar Meghalaya High Court kala shim ïa ka jingshem jong ka 36th Interim report ka Justice BP Katakey Committee kum ka kam ba pynsngewsih, haba maham ba yn thung ïa ka jingtohkit ba laitluid ne ki Central Agency ban pynngat ïa kito kiba donkti ha kaban pynsaphriang ïa ka jingtih dewïong beaiñ ha Meghalaya.
Ka Ïingbishar kala bthah ïa u Deputy Commissioner jong ka East Jaiñtia Hills u Manish Kumar bad ïa u Superintendent of Police u Vikash Kumar ba kin aiti ïa ka kaiphod ba bniah hapoh 10 sngi haba ïadei bad ki sienjam bala shim pyrshah ïa ka kam tih dewïong beaiñ, kynthup ki jingkurup, ka jingkem, bad ki lad ki lynti ban pynduhjait ïa ka jingtih dewïong thliewkhnai ha Mynsngat-Thangsko hadien ka jingbthei, kaba la shim ïa ka mynsiem ki 28 ngut ki nongbylla bad pynmynsaw ïa 8 ngut ha ka 5 tarik Rymphang.
“Ka kaiphod kaba ïadei bad ki lad ki lynti ba la shim hadien ka jingbthei ha Thangsko la buh hakhmat kane ka ïingbishar, bad kaei kaba la pynpaw ka dei ka jingduna ki briew, nalor ki sienjam bala shim ban register ïa ka case bad kem ïa arngut ki briew. Kane ka Ïingbishar ïa mynta kan nym pat pynmih ïa kano kano ka hukum kaba bniah hynrei la bthah ban aiti ïa ka kaiphod kaba bniah hapoh 10 sngi, kaba batai halor ki lynti kiba la shim shuh shuh hapoh ka district baroh kawei ha kaba ïadei bad ki jaka ba don ki par tih dewïong beaiñ, ka jingkurup ïa ki tiar beaiñ ba pyndonkam ha kaba tih, bad ka jingkem ïa ki briew kiba donkti ha ka jingtih dewïong thliewkhnai khamtam ha Mynsngat-Thangsko,” ong ka hukum bala pynmih da ka Division Bench ba khlieh da u Justice HS Thangkhiew bad Justice W Diengdoh ha ka sngi Nyngkong (9 Rymphang).
La bthah ïa ki bor Sorkar ba kin kynthup ïa ki jingtip ba bniah jong ka jingtohkit halor ka jingjia ba 14 tarik Kyllalyngkot ha Thangsko, ha kaba uwei u nongbylla na Assam ula ïap, ha ka kaiphod jong ki.
U Justice BP Katakey u la aiti ïa ka 36th Interim report sha ka Ïingbishar, uba la leit ruh ban jngoh ïa ka par ba bthei ha Mynsngat-Thangsko nalor ki dur ki dar bad ki jingtip bala ïoh haba ïadei bad ka jingïap ki briew ha kane ka jingjia.
Ka kaiphod ka pynpaw ïa ka jingtih dewïong beaiñ bala saphriang ha kylleng ki jaka kum ha ka shnong Mopala bad Sakhain, wat hapdeng ki hukum ka Ïingbishar.
“Ka kaiphod ka pynsngewsih bha bad ka pyni ïa ka jingbym shimkhia ki bor khmih ïa ki kam ba la bynshet ha ki,” ong ka Ïingbishar.
Shuh shuh kala maham ruh “Kane ka Ïingbishar ka kren shai ba kan sa tynrong ïa ka jingkitkhlieh, bad lada donkam, kan sa nang pynmih ïa ki hukum ban thung ïa ka jingtohkit kaba thikna, da ki kynhun ba laitluid lane ki central agency”.
Ka Ïingbishar kala bthah ruh ïa u Deputy Commissioner bad u Superintendent of Police ba ki dang dei ban wan mih hakhmat ka Ïingbishar ha ka sien shongbishar ban wan ha ka 19 tarik Rymphang.
