Shillong, Rymphang 09
U Symbud Myntri Rangbah ka Jylla Bah Prestone Tysong u la pynthikna ba ka Sorkar Jylla kala shim ïa ki lad ki lynti kaba tyngeh ban pynduhjait ïa ka kam tih dewïong beaiñ hapoh Meghalaya.
Haba kren sha ki lad pathai khubor ha ka sngi Nyngkong, u Bah Prestone u la ong, “Ngi la dep ban bthah ïa ki bor District ba kin shim ïa baroh ki lad ki lynti bad ban pynthikna ba baroh kito ki kam beaiñ ki dei ban sangeh noh mardor.”
“Kiei kiei ki jingjia kiba la dep ban jia, ki bor ba dei peit ki la dep ban leh ïa kaba donkam. Nga tharai phi la ïohi ïa kaei kaba la jia, ngi la pyrshang katba lah hynrei mynta kane ka jingjia ba dang shu jia shen, bad phi tip bha ïa ki jaka ba long sha kyndong, nga tharai na surok bah ka shimpor haduh 3-4 kynta wat da ki kali saw shaka, ki jingeh kaba khraw wat ïa ki pulit ba ki mad. Kumta, kumba nga ong sha phi khamtam ha kane ka aiom, ngi la leh tyngeh bha, hadien ba jia kato ka jingjia,” u la kular.
U Bah Prestone u la pyntip ba ka Sorkar kan sa file ïa ka affidavit ha ïingbishar High Court hapoh ka shiphew sngi, hynrei u la kiar ban kynthoh shuh shuh namar kane ka kam ka don hapdeng ka jingbishar ka ïingbishar.
“Ai ba ka High Court kan shim ïa kiei ki sienjam kiba donkam na ka liang jong ka,” u la bynrap.
Ha kaba ïadei bad ka jingjia bthei jong ka par dewïong beaiñ kaba dang jia shen bad shim ïa 28 tylli ki mynsiem ba lui lui, u Symbud Myntri Rangbah u la ong ba ki bor sorkar ki la leh ïa kaba dei ban leh bad ba la kem ruh ïa ki ar ngut haduh mynta.
“Ngin dang bteng ban leh ïa kata, khamtam ha kane ka aiom tyrkhong, ban pynthikna ba ki kam beaiñ ki dei ban sangeh mardor,” u la ai ka jingkular.
“Ngi la dep ban kem ïa ki ar ngut ki briew, ki pulit ki dang don ha ka kam ban wad ïa kiwei pat kiba donkti ha kane ka jingjia. Namarkata, ai ïa ki pulit ba kin wad ïa ka jingdon jong ki nongtih kiba donkti ha ka kam tih dewïong beaiñ.”
Haba kylli hato la buh kano kano ka por kaba la pynbeit ban khangdam noh ïa ki palat 22 hajar tylli ki par dewïong kiba la shu iehnoh kumto, u Bah Prestone u la jubab da kaba ong, “Ka jingkylli halor ka jingbuh por kam mih satia namar kino kino ki kam beaiñ ki lah ban jia lashai ne lashisngi bad na ka liang jong ngi, ki dang ïaleh ban khang lut ïa baroh.”
Ha kaba ïadei pat bad ka jingdawa jong ka liang pyrshah ba u Myntri Rangbah Conrad K Sangma u dei ban hiar shuki, u Bah Prestone u la ong, “Phi lah ban dawa lut ïa kaei kaei. Phi lah ban dawa ba u Bah Prestone ruh u dei ban hiar shuki, kane ka dei kaba don beit hangno hangno hynrei ngan ong ïa phi kawei ba ngi shim lut ïa ka jingkitkhlieh ban pynthikna ba kine ki kam beaiñ ki dei ban sangeh noh mardor.”
