Moscow, Rymphang:
Ka Federal Security Service (FSB) jong ka Russia, ha ka sngi u Blei, u la ïathuh ba ïa utei u briew, uba la suba ba u la shoh ia u ophisar ba ha khlieh duh jong ka tnat syntiat jong ka Russia, u Vladimir Alexeyev, ha Moscow, la kem ïa u ha Dubai bad la aiti noh ïa u sha ka Russia.
U Lieutenant General Vladimir Alexeyev, uba dei u deputy heh jong ka GRU, ka tnat syntiat shipai jong ka Russia, u la shah siat bunsien ha kawei ka apartment block ha Moscow, ha ka Sngi Thohdieng, ong ki nongtohkit. U la shah sumar hadien ka jingshah siat, la ïathuh ki lad pathai khubor jong ka Russia.
Ka FSB ka la ong ba uwei u nongshong shnong jong ka Russia uba la tip kyrteng kum u Lyubomir Korba u la shah kem ha Dubai halor ka jingsuba ba u dei uba leh ïa katei ka kam siat.
U Sergei Lavrov, myntri kam bar ri jong ka Russia, u la kynnoh ba ka Ukraine, ka dei kaba don sha lyndet jong katei ka jingthmu ban pynïap ïa utei u nongïalam, kaba u ong ba ka dei kaba la thmu ban pynthut ïa ka jingïakren ïasuk. Ka Ukraine ka la ong ba kam don jingïadei ei ei bad katei ka jingshah siat.
U nongïalam ‘Boss’ jong u Alexeyev, u Admiral Igor Kostyukov, uba dei u khlieh duh jong ka GRU, u la ïalam ïa ka kynhun jong ka Russia ha ka jingïakren bad ka Ukraine ha Abu Dhabi halor ki bynta kiba ïadei bad ka jingshngaiñ jong ka jingïateh kular kaba lah ban treikam pura.
