Shillong, Rymphang 09
U wei u samla shynrang, la mih ka jingkynnoh ba u la shah shoh dusmon ha ka kynhun ki runar kiba ym lah ban tip ki dei kiei hajan Laban, katkum ka First Information Report (FIR) ba la buh ha Laban Police Station myn ha ka 07 tarik u Rymphang, 2026.
Katkum ka nongmudui kaba dei ka kmie jong u tei u samla ka la ong ba u khun jong ka, u la leit sha ka jingkhawai sngikha ha ka ïing u paralok jong u kaba dei ha Laban Last Stop kumba ha ka por 8 baje mynmiet bad wan phai ha ka por 1 baje mynstep synñia.
La ong ruh ba katba u dang ïaid lynti na ka lynti ïaid kjat ha Harisabha, la mih ka kynhun ki briew kiba patan ïa u sha khmat ïingjah hajan ka ophis Bandhan Bank ha kaba u la shah shoh dusmon.
Katei ka kynhun kaba la patan ïa utei u samla ban shoh ka don kumba 5 ne 6 ngut ki khynnah shynrang bad nalor ka jingshoh jingdat, la ong ba ki la thang ïa utei u samla ha ka ding.
Ha ka FIR, ka nongmudui ka la kyrpad ba ki bor ka aiñ kin shim ïa katei ka jingshah shoh u samla kum ka jingpyrshang pynïap bad ba dei ban pynngat ha ki kyndon ba tyngeh ïa kiba donkti ha katei ka kam.
Shuh shuh la ong ba utei u samla u la shah tied da ki bilor bad dieng ba dang mehding, ha kaba ka khmut bad shyntur jong u ki mih snam bad don ki dak ba ing ding ha ka met jong u bad la kdew ruh ba ki kti ki kjat jong u ki la at.
Ïa kane ka jingjia ha katei ka step synñia la pyntip ruh sha ki pulit bad la phah wan da ka 108 Ambulance ban kit ïa utei u samla sha Hospital ban sumar ïa u.
Ïa ka jingbatai bniah u samla uba shah shoh, uba dang shah sumar, la shim da ki pulit ha ka 08 tarik u Rymphang, 2026 kum shi bynta ka jingtohkit.
