Imphal, Rymphang:
Ïa u President bathymmai jong ka seng BJP ha Manipur Pradesh yn sa jied shen hadien ba la thung ïa ka sorkar kaba pawnam ha kane ka Jylla hapoh ka jingsynshar jong u Myntri Rangbah ka Jylla u Yumnam Khemchand bad ka jingjied dang shen ïa u Nitin Nabin kum u President ka seng BJP ha ka ri.
Ki tyllong khubor jong ka seng ki la ïathuh ba ka jingpynkhreh ban thung ïa u heh sorkar ba thymmai jong ka jylla ka la sahteng namar ka jingeh kaba la slem bha kaba la sdang naduh ka 3 tarik u Jymmang, 2023. La ïathuh ba ki nongïalam pdeng jong ka BJP ki dang ap ïa ka jingwanphai biang jong ka jingsuk kaba ïadei bad ka jingthaw ïa ka sorkar ba la jied shwa ban sdang ïa ka jingkylla nongïalam.
Da ka sorkar paidbah kaba la don mynta, ka jingïakren halor ka jingbujli ïa u President ba mynta jong ka BJP Manipur Pradesh, u Adhikarimayum Sharda, ka la ïoh bor. U Sharda u la shakri kum u President ka jylla jong ka seng naduh ka 26 tarik, Jylliew, 2021. Watla ym pat shym la pynbna paidbah, hynrei ki tyllong khubor ki la pynpaw ba ki nongïalam pdeng jong ka BJP ki thrang bha ban jied ïa u nongïalam uba tbit uba lah ban pynïaid ïa ka seng sha ka ilekshon sha ka ïing dorbar thawaiñ jong ka Manipur ha u snem 2027 bad ban pynskhem ïa ka bor seng jong ka.
