Shillong, Rymphang 10
Ki bor pynïaid district ka East Jaiñtia Hills ki la pynkut noh ïa ka jingïai bteng ban wad bad jingpyrshang pyllait ïa kiba la sahkut ha krem dewïong beaiñ hadien ka jingjia bthei ha Mynsngat-Thangsko, East Jaiñtia Hills.
Ka jingpynkut noh ki bor pynïaid district ban wad ïa ki ba dangsahkut ha katei ka krem ka dei namar ba ym lap metïap shuh ha katei ka jaka.
U Deputy Commissioner ka East Jaiñtia Hills, u Manish Kumar u la aiti ïa ka kaiphod sha u Chief Secretary, u Shakil P. Ahammed, ha kaba u la pynpaw ba ïa kane ka rai la shim hadien ba la sngewhun ïa ka jingpyrshang kaba jur ba la leh da ki kynhun pyllait im bad da kaba pynshong nongrim ha ka jingkheiñ jong ki ba ym lap ei-ei shuh.
U Manish Kumar u la kdew ruh ba la sdang ïa ka jingwad ïa kiba sahkut ha katei ka par dewïong myn ha ka 05 tarik u Rymphang, 2026, tang hadien ba la bthei, ha kaba ki kynhun na ka National Disaster Response Force (NDRF), State Disaster Response Force (SDRF) bad ka Special Rescue Team (SRT) ki la poi sha katei ka jaka bad ki nongtih dewïong na ka thaiñ ruh ki la ïarap ha ka jingtreikam.
Ha ka sngi kaba nyngkong jong ka jingjia ka jingbthei, la sei 18 tylli ki metïap, katba 8 ngut kiba mynsaw la ïoh ban pyllait im bad ai jingïarap mardor.
Ïa kiba mynsaw hadien la phah sha ki jaka sumar bapher-bapher, uwei sha Jowai Civil Hospital, uwei sha Nazareth Hospital ha Shillong bad hynriew ngut pat la phah sumar sha NEIGRIHMS Hospital, Shillong.
Ka jingwad ka la sdang biang ha ka sngi kaba bud, ha kaba la lap sa saw tylli ki met ïap bad ha kajuh ka por, ar ngut kiba la mynsaw bad la pynkit noh sha ïing da ki bahaïing bad hadien ki la khlad noh na ka jingmynsaw jong ki.
Uwei pat uba la mynsaw u la khlad noh katba u dang shah sumar ha NEIGRIHMS Hospital.
Ha ka 07 tarik u Rymphang, 2026, ki kynhun ki la lap sa ar tylli ki metïap bad kham hadien ym lap eiei shuh hapdeng ka jingbteng ban wad.
Ka jingwad bniah kaba la pynlong ha ka 08 tarik u Rymphang, 2026 ruh ym shym la lap shuh ïa ki metïap bad ka jingwad bniah ka la bteng biang ha ka 09 tarik u Rymphang, 2026, bad ym lap ei-ei shuh haduh ba la pynsangeh noh ïa ka jingwad.
