Washington, Rymphang:
U president jong ka America, U Donald Trump, ha ka sngi Nyngkong, ula byrngem ban pynsangeh noh ia ka jingplie ia ka jingkieng kaba thymmai hapdeng ka America bad ka Canada, ha ka jingsiat kaba thymmai pyrshah ia katei ka ri, kaba u la ai jingmut ba ka dei ban long ka jylla kaba 51 jong ka US.
U Trump u la ong ba ka America ka dei ban long trai “ym duna ïa ka shiteng” jong ka jingkieng Gordie Howe kaba dang shna bad pynïasoh ïa ka jylla Ontario jong ka Canada bad ka jylla Michigan jong ka US.
Ka jingtrei halor kane ka jingkieng kaba shongdor $4.7 billion — kaba la ai kyrteng na ka kyrteng jong u Gordie Howe uba la khlad noh na ka National Hockey League — ka la sdang naduh u snem 2018 bad la thmu ban plie noh ha kaba kut jong une u snem.
“Ngan nym ailad ïa kane ka jingkieng ban plie tad haduh ba ka America kan da siew bai lutksan ïa baroh kaba ngi la ai ïa ki, bad ruh, kaba kongsan ka long ba ka Canada ka leh ïa ka America da ka Jinglong Hok bad ka Burom kaba ngi dei hok ban ïoh,” la thoh u Trump ha ka Truth Social.
“Ngin sa sdang ia ka jingiakren, MASTA.”
U nongïalam jong ka seng Republican, uba 79 snem ka rta, u la ujor ba ka Canada, ka don ïa baroh arliang jong katei ka jingkieng bad ka la pyndonkam ïa ki mar jong ka US, ban shna ïa ka.
“Bad mynta, halor kiei kiei baroh, u Myntri Rangbahduh (Mark) Carney u kwah ban iateh bad ka China — ka ban bam im ia ka Canada. Ngin sa ioh tang ia ki jingbam ba sah! Ngam tharai kumta,” la bynrap biang u Trump.
Ka Washington ka la byrngem ban buh khajna 100 percent ia ka Canada hadien ba u Carney u la leit jngoh ia ka Beijing ha u bnai ba la dep bad u la teh ia ka jingiateh khaii pateng ba nyngkong bad ka China.
Ha kajuh ka por, u nongïalam jong ka US u la pynkynmaw biang ïa ka jingkynthoh ba shabar ba ka Beijing kan “pynkut noh ïa baroh ki jingïalehkai Ice Hockey ba la ïalehkai ha Canada.”
U Trump u la ialeh pyrshah bad ka Canada halor ka khaii pateng naduh ba u la wanphai biang ha ka kam ha u Kyllalyngkot 2025. Mynshwa u la khot ia ka America ban pyniasoh ia ka Canada hynrei bunsien u la weng noh ia kata ka jingdawa ha kine ki bnai ba la dep.
Ha kajuh ka por, u Carney u la maham ha ka jingïalang ha Davos ha u bnai ba la dep ba ka rukom synshar pyrthei ba la ïalam da ka US ka dang mad ïa ka “jingkhlad noh,” ha ka jingkdew kaba la tap lypa ïa ka jingpynthut jong u Trump, bad u la ïasaid ba ki bor ba pdeng kin ïatylli lang.
