Shillong, Rymphang 10
U Myntri ka tnad jngohkai pyrthei, u Timothy D. Shira u la pynpaw ba ka Sorkar Jylla ka dang ap ïa ka jingpyllait pisa kaba T.50 klur kaba la mynjur da ka Sorkar Pdeng na ka bynta ban pynheh shuh ïa ka Kad Liengsuiñ Baljek.
“La mang T.50 klur hynrei ym pat shym la pyllait ïa ka pisa sha ka Sorkar Jylla,” ong u Shira ha ki nongthoh khubor ha ka Sngi Ba-ar.
Hynrei u Shira u la pynpaw ïa ki jingartatien halor ka jinglah ban pynheh ïa ka Kad Liengsuiñ na bynta ban pdiang ïa ki liengsuiñ kiba kham heh kum ka ‘Airbus’, da kaba kdew ïa ka jingeh ha ka liang ka jaka.
“Lehse yn ym lah ban pynheh ban pdiang ïa ka jinghiar jong kane ka ‘Airbus’ namar ka jingdon jong ka jaka hangta ka long kaba duna bha. Ki liengsuiñ kiba kham rit kiba kit kumba 60 ngut ki nongleit-nongwan kin sa lah ban hiar hangta,” u la bynrap.
Haba ïadei bad ki jingthmu ban pynroi shuh-shuh, u Shira u la ong ba ïa mynta ym pat don kino-kino ki sienjam ban tei ïa ka Kad Liengsuiñ kaba kham heh.
“Nga tharai kan long kaba eh ban ïoh jaka hangta ban tei ïa ka Kad Liengsuiñ kaba heh,” u la pynpaw.
Na ka liang u Myntri u la pynsngew ruh ïa kawei ka lad, kata ban shna ïa ki jaka hiar ‘Helicopter’ ha ki ‘District Headquarter’, kynthup ïa ka Balpakram, ban kyntiew ïa ki kam jngohkai pyrthei.
