Shillong, Rymphang 10
Ka Joint Action Committee kaba kynthup ïa ki artylli ki kynhun kiba peit ïa ka bha ka miat jong ki trai trok ha Rilum Jaiñtia kata, ka Jaiñtia Hills Truck Owners’ Association (JHTOA) bad ka East Jaiñtia Hills Truck Owners & Transporters Association (EJHTOTA) ki la phah jingthoh sha u Symbud Myntri Rangbah u ba peit ïa ka tnad Transport u Bah Sniawbhalang Dhar ban kyntu ïa ka Sorkar ba kan pyntreikam ïa ka skhim kyrpang halor ki kot kali.
Kine ki kynhun ki la dawa ban sdang ïa ka Special One-Time Settlement Scheme (SOTS) ban ïa ka skhim ba shisien halor ki kot kali ba treikam kham slem namar ka jingbun kiba don kali bad khamtam kiba kham duna ka jingkamai kim lah ban pynbiang ïa ki kot ki sla donkam, kum ki Permit, Fitness Certificate, ki Taxes bad kiwei.
Ha ka dorkhas ka JAC ka la pynpaw “Ngi kyrpad ïa ka ophis kaba don burom ka jong phi ban pdiang bad ban sdang noh ïa ka Special One-Time Settlement Scheme (SOTS) ban pynbeit ryntih noh ïa ki kot ki sla kiba la sahteng la slem bha ban don ïa ki kot ki sla kiba biang.”
Ka Committee ka ngeit skhem ba kane ka skhim kan ai jingmyntoi lang ïa ka Sorkar bad ïa kiba don bynta ha ka kam pynïaid ïa ki kali.
“Kan ïarap mardor ha ka ban pynmih ïa ka khajna na ka bynta ban pynkhuid ïa ka khajna kaba rim ba sah bad ban wanrah ïa bun bah ki kali ki bym treikam sha kata ka bynta ban long kiba la biang ban siew ïa ka khajna” ka la pynpaw.
Shuh-shuh la bynrap “Na ka bynta ki trai jong ki trok, kan pynkupbor ïa ki dkhot ki jong ngi, ïa kaba mynta kim lah ban siew ïa ka khajna kaba heh, ban bteng biang ban trei katkum ka aiñ bad ban lah ban pynbeit ryntih ïa ki kot ki sla kali man la ka snem nangne shakhmat”.
Ka Joint Action Committee ka ngeit skhem ba ka Sorkar kan khmih bniah ïa kane ka mat da ka jingsngew synei bad ban pdiang ïa kane na ka bynta ka bha ka miat jong ka ïoh ka kot ki dkhot bad ka jingïaid ki kali ha ka Jylla.
