Shillong, Rymphang 10
Watla u Bah Hally War uba la don 60 snem ka rta tam u dei tang u nongrep hynrei u la shah jied ban ïoh ïa ka khusnam Padma Shree Award 2026 namar ka jinglah jong u ban pynwandur ïa ka jingkieng jri ha shnong Siej.
Kaba lyngngoh ba wat u Bah Hally um tip mano ba ïarap ïa u ban pynrung ïa kane ka khusnam hynrei u ai khublei ïa ka Sorkar Jylla bad Sorkar India kaba la ithuh ïa u ïa ka jingtrei shitom jong u.
U Bah Hally u dei na ka shnong Siej ka lynti na Sohra ban leit sha Shella kaba hap hapoh ka Elaka Nongkroh Sardarship, u dei uba la shna bad ban pynwan dur ïa ka Jingkieng jri ha shnong ïa kaba la tip kum ka “Umkar Living root bridge” bad u ïoh ruh ïa kane ka khusnam ka dei lyngba ka jingtrei jong u ban pynitynnad bad ban pynwan dur ïa ka diengjri kaba la khring ïa ki nongjngohkai pyrthei.
Kumjuh ruh u Conrad Sangma, Myntri Rangbah ka Jylla bad na ka Myntri ka Sorkar Pdeng ka Nirmala Sitharaman ruh ki la wan ban jngoh ïa katei ka jingkieng jri.
Haba ïakren bad U Nongsaiñ Hima, u Bah Hally War u la ïathuh ba kane ka jingtrei shitom jong u ban shna bad ban pynwandur ïa katei ka diengjri kum ka jingkieng ka dei naduh ka por ba u dang khynnah bad ka la don kumba 50 snem tam kane ka jingshna jong u.
U la ïathuh ba kane ka jaka bad ka diengjri ka dei jong ka shnong hynrei dei lyngba ka mynsiem ban sumar ïa ki diengjri u la trei marwei bad ki don ruh katto katne ki nongïarap.
U la ïathuh ruh ba ha kane ka jaka ka kham itynnad bha ha ka por lyiur bad kiba wan kai ruh ki kham bun bha ha ka por lyiur.
Shuh shuh u la ïathuh ba mynta ka jingkieng kaba la long ban ïaid ka dang dei tang kawei bad ki don ruh kiba dang pynwandur kum ki jingkieng ban ïaid ki dang shim por sa kumba 15 lane 20 snem.
U la pyntip ba ha ka por ba u shna, ki bun ki jingeh namar kum u nongrep u hap ban pyndap bam ïa ka ïing ka sem bad ban shna pynwandur ïa kane ka jingkieng jri.
Kumta u la kyntu ïa ki paidbah na ka shnong ne nabar shnong ba kin pynneh pynsah ïa kane ka jingkieng jri ba kan long ka jingitynnad ïa ka mariang.
Kane ka diengjri kam da jngai na ka shnong hynrei ka shim por tang 10 minit haba ïaid kjat.
