Shillong, Rymphang 10
U Symbud Myntri Rangbah ka Jylla u Bah Sniawbhalang Dhar u la ong ba ka Sorkar kan leh da kaba tyngeh ïa ki briew kiba donkti ha ka ban tih dewïong be-aiñ bad pynpaw ba ka Sorkar ka la leh ïa kaba donkam baroh haba ïadei ka jingjia bthei u dynamite ha krem dewïong Mynsngat-Thangsko, East Jaiñtia Hills District.
Haba kren sha ki nongthoh khubor ha ka sngi Ba-ar, u la kyntu ban kiar na ki jingkdew kti halor ka jingbthei bomb dynamite ha katei ka par dewïong, da kaba ong ba ka jinglong jingman kaba mynta kam dei ka por ban shim kabu ban ïohnong ha ka kam saiñ pyrthei.
U Bah Sniawbha u la pynpaw ïa ka jingsngew-lem ïa ki bahaïing hasem jong kito kiba ngat ha ka jingjia ba sngewsih ha krem dewïong. “Ka jingpyndonkam ïa u dynamite ka dei ka kam be-aiñ bad ka Sorkar kam pynshlur ïa kane, na ka daw jong kine ki briew kiba pyndonkam da u dynamite ngi hap mad ïa kine ki jingjia ba sngewsih hynrei ynda ka la jia kumne, ki jingkynthoh ki wan sha ka Sorkar Jylla,” u la ong.
U la pynthikna ba ka Sorkar ka la shimkhia haba ïadei bad kane da kaba phah ïa ki kynhun sha katei ka jaka bad ki heh Sorkar, kynthup ïa u DC bad SP kiba la don ha katei ka jaka ban peit bad bishar ïa ka jinglong jingman ha katei ka jaka.
U Symbud Myntri Rangbah u la pdiang ïa ki jingkynnoh pyrshah ïa ka Sorkar MDA, da kaba ong ka Sorkar ka pyrshang katba lah ban tehlakam ïa ka jingtih dewïong be-aiñ bad kan pynthikna ruh ba kan ym don shuh ka jingtih dewïong be-aiñ ha ka Jylla.
Haba ïadei ka kyndon ba ka jingheh 100 hectare ka jaka ban tih dewïong kaba ïaid katkum ka juk stad mynta, u Bah Sniawbha la ong ba ka Sorkar Jylla ka dang ïa kren ïa kane ka kam bad ka Sorkar Pdeng ban pynduna ïa ka jingheh ka jaka ban shah ïa ki trai jaka ban tih dewïong.
U la ïathuh ba ka Sorkar ka la ïoh ïa ki jingujor na ki trai par dewïong, kiba pynpaw ba ka 100 hectare ka jaka ka la heh palat bad u la pynpaw ba u Myntri Rangbah ha u snem ba la dep u la ïakren ïa kane sha ka Sorkar Pdeng ban kyrpad ban pynduna ïa ki jingeh khnang ba ki trai Jylla kin lah ban tih dewïong katkum ka juk stad mynta.
