Mumbai, Rymphang:
TIRUPATI: Ki heh jong ka Animal Husbandry jong ka Chittoor distrik ki la pynlong ïa ka jingkem bad peit thuh bad pynïap ïa ki sim bad ki syiar kiba shah ktah lajan 3 hajar tylli ha ka shisngi kum shi bynta ban ïada na ka jingsaphriang ka khlam kaba la ïaibteng ha kylleng ka thaiñ Rayalaseema, khamtam ha ki distrik kiba kynthup ha Chittoor, Annamayya bad Tirupati, ha kaba ka kam ri sim ka long kaba jur bha.
La phah ïa ki kynhun sumar ba hakhlieh duh jong ka distrik bad ki nongtrei jong ka Animal Husbandry ha ka jaka ban tehlakam ïa ka jinglong jingman bad ban ïada na ka jingsheptieng jong ki paidbah.
Ha kajuh ka por, ki heh sorkar ki dang ap ïa ka kaiphod jong ka nongmuna da ka snam bad ka umbiah ba la lum na ki syiar bad ki sim ba la ïap ha RKM Puram ha Karvetinagar mandal, ïa kiba la phah sha Bhopal High-Security Laboratory ban leh ïa ka jingpeit bniah.
Ki bor pynïaid distrik ki suba jur ba ka daw tynrai jong ka jingsaphriang jong ka jingpang khlam sim ha ki jaka ri syiar ha Chittoor bad Annamayya distrik ka lah ban dei na ki tyngab kiba rung na ki thaiñ khappud jong ka Tamil Nadu. Lah ban kdew ba da ki hajar tylli ki tyngab, la ïathuh ba ki la ïap ha ki katto katne ki bynta jong ka Tamil Nadu, ha kine ki sngi ba ladep, namar ka jingpang khlam.
Ki heh sorkar ki ngeit ba une u khñiang jingpang u lah ban saphriang sha ki syiar lyngba ka jingpynhap bam, ka eit, ki jingjaw umbiah na kine ki tyngab ha kaba kane ka la pynjur ïa ka jingsaphriang jong ka jingpang hapdeng ki syiar.
