Agartala, Rymphang:
Ka jingïaid lynti jong ki bor pahara ba la ïalam da ki riewstad ha kylleng ka Tripura ka la pynlong ïa ka jingpynjot ïa ki jaka rep beaiñ ïa u Ganja kiba la shongdor palat T.125 klur, kaba pynpaw ïa ka jingpynbor biang da ki bor pahara ban khanglad ïa ka jingrep jingdih pynbuaid.
Ha kane ka jingpyntreikam kaba dang shen, ki shipai Assam Rifles, kiba ïatreilang bad ka tnad khlaw, ki la pynlong ïa ka jingkhynra ha ka thaiñ Boxanagar, kaba jngai kumba 41 km shaphang Shathie jong ka Agartala. Kumba 1.75 lak tylli ki tynra Ganja kiba la mih ha kylleng ki jaka ha ka jingheh kaba 50 akar ki la shah pynjulor bad shah jynrat naduh tyllong. Ki heh pulit, ki la buh ïa ka dor ïew jong une u jingthung ha ka dor T.25.72 klur.
Ki heh jong ka tnad pahara ki la ong ba kane ka jingtreikam ka long katkum ki jingai jingmut ba kyrpang bad ka pyni ïa ka jingïatreilang kaba jan hapdeng ki shipai Assam Rifles bad ki bor synshar paidbah. “Ka jingpyrkhat ka long ban pynthut ïa ka jingrep shwa ba kan rung ha ka lynti jong ka jingkhaïi beaiñ,” ong uwei u heh pulit bad bynrap ba ki jingpyrshang kin dang ïai bteng ban thmu ïa ki khlaw kiba sha kyndong bad ki jaka khappud.
Khyndiat sngi shuwa, kata ha ka 29 tarik u Kyllalyngkot, ki bor pahara ki la pynlong biang ïa ka jingkhynra kaba ïatreilang ha ki jaka khlaw kiba kynthup ïa ka Kamalanagar, Krishnadola, Dulunga bad Bijoy Nagar ha Sonamura Subdivision.
