Shillong, Rymphang 10
Ka Reserve Bank of India (RBI) da ka jingthmu ban pynsngewthuh kham bha ïa ka jingmut KYC ka la plie paidbah ïa ka Financial Literacy Week (FLW) 2026 halor ka phang KYC-Your First Step to safe Banking.
Ïa kane ka week la wan ban plie da u Bah Frederick Roy Kharkongor IAS Principal Secretary Government of Meghalaya ha ka jingïadonlang u Bah Olden Nongpluh General Manager (O-i-C), RBI Shillong, DGM NABARD, ki heh ophisar Sorkar ki nongtrei bank ki nongmihkhmat na ka Centre for Financial Literacy (CFL) bad kiwei de ha ka jingïalang ba la long ha Courtyard, Shillong.
Ïa ka FLW la rakhe ha baroh kawei ka ri naduh ka 9 haduh ka 13 tarik u Rymphang 2026, ban pynleit jingmut ïa ka Financial Inclusion (FI) skhim lyngba ka re-KYC jong ki Bank Account khnang ban pynthikna ïa ka jingtreikam jong ki bank khlem kino-kino ki jingthud.
Shuh-shuh ka jingpynshai ka long ba nalor ka jingdonkam ba kongsan jong ka KYC, ka long ruh kaba suk ban leh ryngkat ki lad jingïada kiba bun. Ka jingpynsngewthuh paidbah ka thew kyrpang kumno ban pynshai ïa ki paidbah bad ki Central KYC (CKYC), kaba ïarap ban pynsuk ïa ka KYC.
U Bah Frederick haba ai jingkren, u la kyntu ïa baroh ki nongïashim bynta ban shim ïa ki lad ban pynsngewthuh ïa ki paidbah ïa ka jingdonkam jong ka KYC bad ba kin ïada ïalade na kino-kino jingshah ïalam bakla.
U Bah Olden Nongpluh, u la pynshai ïa ka mynsiem ïatreilang halor kane da kaba u ong, “Ka Reserve Bank of India, ha ka jingïatreilang ki bank bad ki nongïashim bynta, kan pynneh pynsah ïa kine ki kam ha baroh shisnem ban pyntikna ïa ki kam kiba neh. “Kane ka jingpynshai paidbah ka la pyntikna ïa ka jingtrei shitom jong ngi ban pynlong ïa ka KYC ka bynta ba kongsan jong ka jingtrei bank kaba shngaiñ na ka bynta baroh ki nongshong shnong.”
Kine ki jingpynshai paidbah kaba neh shi taïew ha Jylla Meghalaya ka kynthup ïa ki prokram pynshai paidbah ba ha kylleng ki District, ha ka jingtreilang jong ki bank, ki tnad ka Sorkar bad ki nongïashim bynta ha ka imlang sahlang ban pynksan ïa ka jingsngewthuh ba janai ïa ka KYC ha ka jingpynïaid pisa kaba tikna bad kaba shngaiñ.
