Shillong, Rymphang 10
Ka North Eastern Council (NEC) ka la seisoh ha ka ban pyndep ïa 2 tylli ki projek kiba kongsan ha Meghalaya, kiba pynleit jingmut ha ka roi ka par ba ïadei bad ki jingtei bad ka jingkyntiew ïa ki lad kamai.
Ka projek ka banyngkong, kaba la pyndep ha ka jinglut kaba T.5 klur, ka pynbiang ïa ki jingshakri ba kongsan ba la pynithuh, ha Rongara, South Garo Hills District.
Kane ka sienjam ka la pynkhlaiñ ïa ki jingtei ha ka thaiñ, kynthup ïa kawei ka ‘Market Shed’, ka jingkieng RCC ba ïaid kali, 12 tylli ki ‘tank’ um, 12 tylli ki ïingskul, ka Conference Hall, bad ki surok ïaid kali (CC).
Ka projek ka la pynbha ïa ka rukom im, ka jinglong-jingman ka ïoh ka kot, bad ka leit ka wan jong ki mar rep ha ka thaiñ.
Ka projek kaba ar, kaba la pyndep ha ka jinglut kaba T.2.03 klur, ka kyntiew ïa ka rep ka riang kaba pynïasohlang lyngba ka ri-sniang, ri-dohkha ha ki shnong kiba hap hapoh ka Umling bad Jirang C&RD Block ha Ri-Bhoi District.
Kane ka jingthmu ka la kyntiew ïa ka rukom im, pynbha ïa ka ïoh ka kot jong ki longïing, bad kyntiew ruh ïa ki rukom rep kiba pynneh-pynsah ïa ka mariang.
Kine ki projek ki pyni ïa ka jingshimkhia jong ka NEC ban kyrshan ïa ka jingkiew jong ka Meghalaya lyngba ka roi ka par jong ki jingtei, ka jingpynbha ïa ka lad kamai, bad ki rukom treikam kiba lah ban pynneh-pynsah.
