Shillong, Rymphang 10
Haduh phra ngut ki khar Bangladesh ki la shah bat na surok hajan jong ka lad ban leit sha krem Arwah, Sohra ha East Khasi Hills.
Katkum ka khubor kaba la ïoh na ki pulit la ong ba ha ka 8 tarik mynta u bnai, ha ka por kumba 9.30 mynmiet, ki phra ngut ki khar Bangladesh kiba la tip kyrteng kum u Nishkam Das (50 snem), Jony Das (18 snem), Shami Roy (26 snem), Tapan Dhar (57 snem), Apu Dab (38 snem), Kamal Dey (37 snem), Rubel Nandi (37 snem) bad ka Indulekha Das (24 snem) ki la shah bat noh katba ki dang don ha ki ar tylli ki kali ha katei ka jaka.
La ong ba ïa kine ki briew la ïoh bat ha ka por ba ki dang don ha ki ar tylli ki kali Maruti Alto K10 kaba don ïa u registration number ML05-Z-4156 ba la ñiah da u Bankerlang Laitmon (31 snem) bad ka kali kaba don ïa u registration number ML05-AE-2846 kaba la ñiah da u Pyndaplang Warjri (34 snem).
Shuh shuh na ka liang jong ki pulit ki la pyntip ba ha ka por ba pynlong ka jingtohkit, la lap ba uwei u briew ba la tip kyrteng kum u Bapon na ka shnong Sohlap, Shella (EKH) u la ïarap ïa kine ki khar Bangladesh bad ba ki don ha ka lynti da ka jingthmu ban leit sha Mayapur Nadia (WB).
