Shillong, Rymphang 10
Ki kam tuh kam thiem ki la nang ïai bteng na kawei ka sngi sha kawei pat bad ïa kane lah ban sakhi na ki jingjia shah tuh jong ki arshaka, ka jingshah prong tuh jong ki ïing, ki jingshah tuh jong ki tiar ki tar ha kine ki khyndiat sngi ba la leit.
Katkum ka khubor na ki pulit la ong ba ka la don ka jingujor ba ha ka 5 tarik mynta u bnai, ki runar bym lah ban ithuh, ki la tuh bun bah ki jaiñ na phyllaw jong ka Working Women Hostel kaba don ha Rilbong, Shillong.
Na ka liang jong u Suman Sinha u la ai ka jingujor ba ha ka 6 tarik mynta u bnai, ki runar bym lah ban ithuh ki la tuh ïa ka kali jong u, kaba don ïa u registration number AS10-G-3339 na ka thaiñ Umpling Dongshaneng Block-V, Shillong.
U Darmen A Sangma u la ai ka jingujor ba ha ka 7 tarik mynta u bnai, ha ka por kumba 9.30 mynstep, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-AE-6667 na ka jaka sah jong u, kaba don ha Mawpat, Circle-3, Shillong.
Na ka liang jong u Basant Biswa ruh u la ai ka jingujor da ka ktien ba ha ka 8 tarik mynta u bnai, ha ka por kumba 7 baje janmiet, u la lap ba ka arshaka ka jong u, kaba don ïa u registration number ML05-T-4401 ka la jah na ka thaiñ Mawlonghat, Shillong.
Ka Shiva Kumari Thapa ruh ka la ai ka jingujor ba ha ka step jong ka 5 tarik mynta u bnai, ki runar bym lah ban ithuh, ki la tuh ïa ka pisa kaba long T.50 hajar na ka ïingsah jong ka, kaba don ha Mawbah, Shillong.
Katba ha ka 9 tarik mynta u bnai, u D Chakma u la pyntip ba ki runar bym lah ban ithuh, ki la tuh ïa ka arshaka ka jong u, kaba don ïa u registration number AS01-GN-9083 na ka thaiñ Lumjingsuk, Block-A Madanrting, Shillong.
Na ka liang jong ka Kong Wanlina Dkhar ka la ai ka jingujor ba ha ka 6 tarik mynta u bnai, ki runar bym lah ban ithuh, ki la tuh ïa ki coins, ka pisa, ki COD articles bad ki parcel kiba shongdor kumba T.15,000/- na Khliehriat Sub-Post Office (EJH).
Na ka liang jong u Principal ka ITI, West Garo Hills, Tura ruh u la ai ka jingujor ba ha ka janmiet jong ka 1 tarik mynta u bnai, ki runar bym lah ban ithuh ki la tuh ïa ki tyndong LPG na quarter jong ka ITI Campus, Tura (WGH).
