Imphal, Rymphang:
Lai ngut ki briew kiba la shah kynnoh ba ki la donkti ha ka kam pynbthei bom ha Imphal West ki la shahkem.
Kine kiba la shah kynnoh ki dei ki dkhot jong ka Kangleipak Communist Party ka seng kaba la shah ñiew beaiñ. Ïa ka pistol bad ki kuli la ïoh ban kurup na ki, la ïathuh ki pulit hynnin ka sngi.
ïa kine la kem hadien ka jingtohkit halor ka jingbthei bom kaba la jia ha ki thaiñ Lilong Chajing jong ka Imphal West district lai sngi mynshwa. Katkum ka kyrwoh na ki pulit la ong ba kitei kiba la shah kynnoh ki dei ki shipai kiba trei shitom jong ka Kangleipak Communist Party (Apunba) kaba la shah khang pyrshah.
Kane ka jingïohkem ïa kine ki lehnoh, ka la long shi sngi hadien ba ki bor pahara ki la pynjur ïa ka jingwad bad jingkhynra ha kylleng ka jylla naduh ba la mih biang ka jingïakynad hapdeng ki jaitbynriew.
Hashwa, kane, ki la don kumba 23 tylli ki ïing ki la shah thang ha kawei ka shnong ha Manipur ha ka miet jong ka sngi U Blei wat hapdeng ka jingkhang dam kaba khlem buh por ha katei ka thaiñ, la ïathuh ki heh sorkar ha ka lah sngi U Blei.
Kane ka jingjia ka dei ka jingmih na ka jingïakajia ha ka sngi Saitjain hapdeng kawei ka kynhun Tangkhul Naga bad kawei ka kynhun Kuki ha ka shnong Litan Sareikhong ha Ukhrul distrik ha ka por 8.30 baje mynstep, ki la ïathuh.
Ha katei ka jingïakajia, uwei u briew uba kyrteng kum u Sterling Shimray uba dei na ka shnong Sakibung kaba don marjan, u la mynsaw ha ki tyngam jong u, hadien kane ka la mih ka jingïakynad hapdeng kitei ki ar tylli ki shnong, la ïathuh ki pulit.
Nangta u Majistor ka distrik u la pynmih ïa ka hukum khang kaba sdang naduh ka por 7 baje janmiet jong ka sngi U Blei, da kaba ong “katkum ka khubor na ka tyllong khubor ba lah ban shaniah ka don ka jingtieng kaba lah ban wanrah ïa ka jingpynkheiñ ïa ka jingsuk bad jingsuk paidbah ha ka shnong Litan hapdeng ki ar jaitbynriew kata hapdeng ka Tangkhul bad Kuki.”
Da kaba pyrshah ïa katei ka hukum, ki nongïakhih kiba bun ki la mih sha surok ha ka miet jong ka sngi U Blei bad don napdeng jong ki kiba la siat kuli. Ki la thang ym duna ïa ki 23 tylli ki ïing kiba dei jong ki jaitbynriew Naga ha katei ka thaiñ, la ïathuh ki heh sorkar.
Ki durkhih ba la pynsaphriang ha ki Social Media ki la pyni ïa ki katto katne ki samla kiba thang ïa ki ïing ha ka shnong Litan kaba dei jong ka jaitbynriew Tangkhul Naga.
La pynjari shuh shuh ïa ki bor pahara ha katei ka jaka ban tehlakam ïa ka jinglong jingman jong ka aiñ bad ka suk ka saiñ.
Uwei u heh pulit u la ong ba ka jinglong jingman ka dang don hapoh ka jingpynïaid hynrei ka dang don ka jingkulmar ha ka shnong bad ym pat shym la kem ïa ki briew ha kaba ïadei bad katei ka jingjia.
U briew uba la mynsaw, u la shah sumar ha Regional Institute of Medical Science (RIMS), Imphal.
U Myntri Rangbah ka jylla u Yumnam Khemchand haba leit ban jngoh ïa u lanot, ha katei ka Hospital ha ka lah sngi U Blei, u la khot ïa ka jingïasuk hapdeng ki nongshong shnong. “Nga la pynrem ïa ka jingjia ha Litan. Baroh ar jaitbynriew ki dei kiba don ha ka niam Khristan, kumta nga la kyrpad ïa ki ba kin ïa map bad klet noh ban wanrah ïa ka shongsuk shongsaiñ.”
Nalor kane, ka tnad Transport jong ka jylla ka la pynrung ïa ka jingshakri liengsuiñ kaba kyrpang na ka bynta ka Imphal-Ukhrul-Imphal ha kaba ïadei bad ka jingsuk ïa ki paidbah bad ka leit ka wan.
Ka kyrwoh ha ka lah sngi U Blei da u Additional Chief Secretary (transport) jong ka Manipur, u Anurag Bajpai, ka la ong, “Ka sorkar ka la buh por ïa kawei ka jingleit jingleit jong ka Special Helicopter Service na ka bynta ka sngi Balang, kata ha ka 11 tarik, Rymphang na ka bynta ka Imphal-Ukhrul-Imphal. Kine ki jingshakri ba kyrpang jong ki liengsuiñ ki long kiba la buh por palat ïa ka por ba la buh.”
