Shillong, Rymphang 10
Ka North Eastern Council (NEC) ka la pyllait ïa ka pisa kaba T.5,69,53,000 haba ïadei bad ki kam pynroi bapher-bapher ha Meghalaya hapoh jong u bnai Kyllalyngkot, 2026.
Ki projek ki kynthup ïa ka jingtei ïa ki ïingskul, ka jingkyrshan na bynta ki tiar sumar, bad ki kam pynroi ha ka liang ki jingtei.
Ka pisa ba la mang ka kynthup na ka bynta ban tei ïa ka ïingskul ha ka skul RKM, Nongjngi Nartiang, ka jingkyrshan na bynta ka kor MRI kaba 1.5T ha Tura Civil Hospital, ka jingtei ïa ka R.K. Mission School, Sohra, bad ki kam pynroi haba ïadei bad ka Williamson Sangma State Museum ha Shillong.
Nalor kata, hapoh ka NESIDS (Roads), la pyllait T.3.91 klur ban kyrshan ïa ki projek pynïasoh surok ba kongsan ha ka Jylla.
Kane ka pisa kan kynthup na ka bynta ban shna surok na sor Shillong sha Kad Liengsuiñ Umroi, ka ban ai jingmyntoi ïa ki nongshong shnong kiba don kumba 7287 ngut lem bad 10 tylli ki shnong.
Ka NEC ka la pyllait T.81,50,78,461/- ha kylleng ki Jylla ka Thaiñ Shatei Lam Mihngi bad sha ki tnad treikam jong ka thaiñ ha u bnai Kyllalyngkot, 2026, kaba pyni ïa ka jingangnud jong ka ban pynkhlaiñ ïa ki jingthmu ba ïadei bad ki kam pynroi ha ka Thaiñ Shatei Lam Mihngi lyngba ki kam pynroi jong ki jingtei, ka jingpynbha ïa ki lad kamai, ka jingkyntiew ïa ka lariti, ki kam wad bniah bad ki stad buit thymmai.
Ka North Eastern Council (NEC) ka la pyllait T.32,59,10,251 sha ki tnad Sorkar Pdeng, jong ka thaiñ bad kiwei-kiwei ki tnad treikam, kynthup ïa ki shlem pule bad ki kynhun ba ïadei bad ka riti-dustur, ha u bnai Kyllalyngkot, 2026.
Kane ka jingpyllait pisa ka kyrshan ïa ki projek bapher-bapher ha kylleng ka Thaiñ Shatei Lam Mihngi, kaba pynleit jingmut ïa ka pule-puthi, ki jingtei, ki kam jngohkai pyrthei bad ka jingpynneh-pynsah ïa ka kolshor.
Katto-katne ki projek ba kongsan ki kynthup: ban seng ïa ka Resource Center na ka bynta ki jaidbynriew Koireng ha Manipur ban pule ïa ka Linguistic Art & Culture, ban tei ïa ki ïingskul, ki Hostel bad ki Science Lab ha Mizoram, Assam bad Manipur, ban tei ïa ka Multipurpose Convention Center bad ka Space Exhibition Facility ha NESAC, ban tei ïa ki Tourist Circuit ha Senapati District, Manipur, bad ban kyntiew ïa ki kam jngoh kai pyrthei ba ïadei bad ka sha ne ka ‘Tea Tourism’ ha Tamenglong District, ban pynïeng ïa ki Bamboo Tissue Culture Unit’ kumjuh ban kyntiew ïa ka jingthung siej.
Ki kam bym don jingïadei bad ki projek ki kynthup ïa ki jingïalang ‘International’ bad ‘National Seminar’, ki tamasa lariti bad ki prokram ba ïadei bad ki samla. Ki prokram ba kongsan kiba la kyrshan da ka NEC ki kynthup ïa ka ‘International Sustainable Summit’ ba 2 sngi, ka ‘Eagle Nest Bird Festival’ bad ‘Sikpui Roui’ (Hmar Festival).
