Shillong, Rymphang 10
Ka Jaiñtia National Council (JNC) hapoh ka jingïalam u Bah Sambormi Lyngdoh, President, ka la dawa ba ka Sorkar Jylla ka dei ban tohkit lang ruh ïa ki briew ba rung beaiñ ym tang ka kam tih dewïong beaiñ.
Haba kren sha ki lad pathai khubor ha ka sngi Ba-ar jong ka taïew ha Shillong Press Club u Bah Sambormi Lyngdoh u la ong ba kane ka jingjia bthei bom dynamite ha ka par dewiong beaiñ ha Thangsko, kam dei ka jingbakla ne jia ryngkhat hynrei ka don kaei-kaei sha lyndet.
U la ong ba ka jingjia ha Thangsko ka lah ban dei ka thma ba jar jar jongno re jongno, da kaba pynpaw ba ha ka por ba jia katei ka jingjia na ki 5 ngut ki trai par dewïong, ar ngut ki pynsangeh trei ha ka por ba jia katei ka jingjia.
Nalorkata, u la ong ruh ba ka Sorkar Jylla haba ka thung Judicial Inquiry, kam dei ban thung tang na bynta ka jingtih dewïong beaiñ hynrei ka dei ban thung ruh na bynta kiba rung beaiñ sha kane ka Jylla khamtam kiba na ri Bangladesh.
“Ka jingbun ki nong Bangladesh ha ka Jylla jong ngi, ka long ka jingma kaba khraw. Kumta ka Sorkar ka dei ban kyndang naphang ïa baroh kiba shu wan sah beaiñ ha kane ka Jylla jong ngi khamtam ha Rilum Jaiñtia baroh kawei,” la ong u Bah Sambormi.
Shuh shuh u la ong ruh ba ka jingkhang ïa ka jingtih dewïong ka dei ka bym lah ban long bad kumta ka Sorkar ka dei ban wanrah da ka Small Scale Mining namar ba ka kam tih dewïong ka dei ka kamai jakpoh ki nongshong shnong.
Haba bynrap biang, u Bah Sambormi u la kdew ba kane ka jingjia ha Thangsko ka la pynshong syier ïa ka Jylla baroh kawei.
